मुंबई (इंडिया दर्पण वृत्तसेवा) – ‘मिस्टर परफेक्शनिस्ट’ अशी ओळख असलेल्या आमीर खान याच्या चित्रपटांची प्रेक्षक अत्यंत आतुरतेने वाट पहात असतात. अत्यंत मोजकेच आणि निवडक चित्रपट करणाऱ्या आमीरवर चाहते म्हणूनच प्रेम करतात. सध्या मात्र आमिरचा नवीन ‘लाल सिंग चड्ढा’ हा चित्रपट वादाच्या भोवऱ्यात सापडण्याची चिन्हे आहेत.
आमीर खान आणि करीना कपूर यांच्या प्रमुख भूमिका असलेला ‘लाल सिंग चड्ढा’ हा चित्रपट ११ ऑगस्ट रोजी प्रदर्शित होणार आहे. त्याच्या प्रदर्शनाची जोरदार तयारी देखील सुरू आहे. मात्र, आता ट्विटरवर या चित्रपटावर बहिष्कार घालण्याची मोहीम सुरू करण्यात आली आहे.
#boycottlaalsinghchaddha या हॅशटॅगवर जवळपास ७० हजार ट्विट आहेत. लोक मुख्य कलाकार आमीर तसेच करीना यांना ट्रोल करत आहेत. यासाठी आमीर तसेच करीना यांच्या आजपर्यंतच्या अनेक वक्तव्यांचा आधार घेण्यात आला आहे. नेपोटिझमवरील वक्तव्यापासून आणि लोकांना नको असल्यास तिचे चित्रपट पाहू नयेत या करीनाच्या वक्तव्यापासून ते आमिर खानच्या चित्रपटांमधील वादग्रस्त दृश्ये “हिंदू धर्माच्या विरुद्ध” असतात, अशा अनेक गोष्टींचा त्याला आधार आहे.
“#LalSinghCaddha च्या महागड्या तिकिटांवर पैसे वाया घालवू नका. त्याऐवजी गरीब मुलाला खायला द्या. #BoycottLaalSinghCaddha (sic)” असे ट्विट रविवारी एका व्यक्तीने केले. “आप जाते हो ना फिल्म देखना तो मत जाओ. करीना के खान. ठीक है, हम लोग नही जायेंगे”, असे दुसऱ्या व्यक्तीने म्हटले आहे.
आमीर खान याचा लालसिंग चड्ढा हा चित्रपट ‘फॉरेस्ट गंप’ या हॉलीवूड चित्रपटाचा रिमेक आहे. या चित्रपटाद्वारे तेलुगू अभिनेता नागा चैतन्य बॉलीवूडमध्ये पदार्पण करणार आहे. हा चित्रपट ऑक्टोबर २०१९ मध्ये तयार झाला आणि त्यानंतर कोरोनामुळे त्याच्या प्रदर्शनाला उशीर झाला. निर्मात्यांनी अखेर याच्या प्रदर्शनाची तारीख निश्चित केली आहे. आणि सध्या मोठ्या प्रमाणावर चित्रपटाचे प्रमोशन सुरू आहे.
Aamir Khan Movie Laal Singh Chaddha Controversy
