त्र्यंबकेश्वर (इंडिया दर्पण वृत्तसेवा) – श्रावण सरी अंगावर झेलत हजारो भाविकांनी आद्य ज्योतिर्लिंग श्री क्षेत्र त्र्यंबकेश्वर येथे भगवान त्र्यंबकराजाच्या दर्शनासाठी गर्दी केली होती. पहिल्या सोमवारी सुध्दा भाविकांनी प्रचंड गर्दी केली होती. रविवारी सकाळी शहरी नागरीकांनी प्रदक्षिणेचा लाभ घेतला. रविवारी दिवसभर पावसाने छान उघडीप दिली. मात्र संध्याकाळी सात पासून पावसाने जोर पकडला. रविवारी रात्रीपासूनच प्रदक्षिणेला भाविकांची गर्दी सुरु झाली. अभंग गात, बम बम भोले चा जयघोष करीत भाविक प्रदक्षिणेला जात होते. पन्नास हजारांपेक्षा अधिक भाविकांनी ब्रह्मगिरी प्रदक्षिणा केली.
पहाटे पासूनच भगवान त्र्यंबकेश्र्वराच्या दर्शनासाठी भाविकांच्या रांगा लागल्या होत्या. पूर्व दरवाजातून धर्मदर्शन तर मंदिराच्या उत्तर दरवाजातून पेड दर्शन व नेमून दिलेल्या वेळेत स्थानिक नागरीकांना दर्शनासाठी सोडण्यात येत होते. धर्मदर्शन रांग थेट बडा उदासी आखाड्यायर्यंत गेली होती. देणगी दर्शनासाठीही मोठी रांग लागली होती. खासगी वाहनांना याही सोमवारी गावात प्रवेशबंदी होती. त्यामुळे श्रीसंत गजानन महाराज चौकात नाशिकबाजुकडे व जव्हार बाजुकडे खाजगी वाहनांची गर्दी झाली होती.
दुपारी ठिक तीन वाजता भगवान त्र्यंबकेश्वराच्या पालखी सोहळ्याला सुरुवात झाली. पानाफुलांनी सजविलेल्या पालखीत भगवान त्र्यंबकेश्वराचा पंचमुखी सुवर्ण मुखवटा विराजमान करण्यात आला. बॅण्डच्या तालावर वाजतगाजत पालखी कुशावर्त तिर्थावर आणण्यात आली. या ठिकाणी एक तास भगवान त्र्यंबकेश्वराची पूजा अभिषेक करण्यात आला. वंशपरंपरागत पुजारी वेदमुर्ती चिन्मय फडके यांनी पूजाविधी पार पाडला तर शागिर्द म्हणुन समीर दिघे, मंगेश दिघे, संजय दिघे, कुणाल लोहगावकर, गंधर्व वाडेकर यांनी सेवा बजावली. आरती झाल्यावर पुन्हा मुखवटा पालखीत विराजमान करून पालखी मंदिरात आणण्यात आली.
या सोहळ्यात मंदिर संस्थानचे विश्वस्त प्रशांत गायधनी, भूषण अडसरे, तृप्ती धारणे यांचे सह देवस्थान ट्रस्टचे अधिकारी, कर्मचारी, शेकडो भाविक सामील झाले होते. एकादशी व श्रावण सोमवार निमित्त कुशावर्त तिर्थावर स्नानासाठी भाविकांनी मोठया प्रमाणावर गर्दी केली होती. जवळपास एक लाखाच्या आसपास भाविकांनी आज येथे हजेरी लावली. पोलीस अधिक्षक सचिन पाटील, अप्पर पोलीस अधिक्षक माधुरी कांगणे, यांचे मार्गदर्शनाखाली पो. उपअधिक्षक कविता फडतरे, पोलीस निरिक्षक संदीप रणदिवे, पो.ऊ.नि. अश्विनी टिळे व सहकार्‍यांनी यांनी मोठा बंदोबस्त लावला होता.
