शेअर बाजारात इनिशिअल पब्लिक ऑफरमध्ये (आयपीओ) कंपन्या यादीत समाविष्ट करून गुंतवणूकदारांना शेअर विकण्यासाठी प्रस्ताव आणतात. त्यासाठी शेअर बाजारात स्पर्धा सुरू आहे. परंतु अशा कंपन्यांमध्ये डोळे झाकून गुंतवणूक करणे अंगलट येऊ शकते. त्याला कारणही तसेच आहे. शेअर बाजाराच्या यादीतील ५० कंपन्या पैसा घेऊन पसार झाल्या आहेत. यातील सर्वाधिक कंपन्या महाराष्ट्रातील आहेत. दिल्ली आणि उत्तर प्रदेशमधील पत्ते असलेल्या कंपन्यांचाही यात समावेश आहे. एका अहवालात ही माहिती उघड झाली आहे. याआधी १९९० च्या दरम्यान अशी प्रकरणे समोर आली होती.
बीएसईला प्रत्युत्तर नाही
बॉम्बे स्टॉक एक्सचेंजने (बीएसई) डिसेंबरमध्ये या कंपन्यांकडून काही नियमांतर्गत काही गोष्टींचे स्पष्टीकरण मागितले होते. बीएसईने कंपन्यांना टपालाद्वारे नोटिसा पाठविल्या होत्या.परंतु नोंदणीकृत पत्त्यांवर कंपन्यांचे कोणतेही कार्यालय नसल्याचे आढळल्याने बीएसईच्या भुवयाच उंचावल्या. बीएसईने पुढील कारवाईसाठी वेगाने तयारी सुरू केली आहे.
आता पुढे काय
बीएसईने गेल्या सहा महिन्यांच्या माहितीच्या आधारे या कंपन्या आणि त्यांच्या संचालकांना ई-मेलद्वारे माहिती मागविली आहे. १५ दिवसांच्या आत उत्तर न मिळाल्यास नियमांनुसार कारवाई केली जाणार आहे. वाणिज्य मंत्रालयालासुद्धा याबाबत अवगत करण्यात आले आहे. कंपनी अधिनियम २०१३ अंतर्गत पुढील कारवाई केली जाणार आहे.
कायदा काय सांगतो
या क्षेत्रातील तज्ज्ञ सांगतात, दोन वर्षांपर्यंत कोणत्याही कंपनीकडून माहिती मिळाली नाही, तर तिला फरार कंपनीच्या श्रेणीमध्ये टाकले जाते. परंतु कंपनी अधिनियम २०१३ मध्ये याबाबत कोणताच उल्लेख नाहीय. अशा कंपन्यांवर अंकुश लावण्यासाठी अनेक तरतुदी आहेत.
गुंतवणूकदारांनी काय करावे
तज्ज्ञ सांगतात, फरारी कंपन्यांकडून वसुली करणे खूपच कठीण आणि वेळखाऊ प्रक्रिया आहे. शेअर बाजाराच्या यादीत एखाद्या कंपनीची नोंदणी झाल्यास काही महिने त्यांचे शेअर तेजीत असतात. त्यामुळे गुंतवणूकदारांनी प्रलोभनाला बळी पडू नये. संपूर्ण पडताळणी केल्यानंतर प्रसिद्ध कंपन्यांमध्ये गुंतवणूक करण्यास प्राधान्य द्यावे.
कोणत्या राज्यातील किती कंपन्या फरारी
महाराष्ट्र – १४
गुजरात – ७
तामिळनाडू – ६
दिल्ली – ५
पश्चिम बंगाल – ५
कर्नाटक – ३
हरियाणा – २
आंध्र प्रदेश – २
तेलंगणा – २
उत्तर प्रदेश – २
छत्तीसगड – १
मध्य प्रदेश – १
Follow India Darpan
ताज्या बातम्या आणि चर्चांसाठी आमच्या सोशल मीडियावर जोडा!
ग्रामीण ते शहरी आणि जुन्या ते नव्या अशा सर्वच पातळीवर आम्ही विकास पत्रकारितेला अधिक महत्त्व देतो. समाजोन्नती व्हावी, लोकशाही बळकट व्हावी, अन्यायाला वाचा फोडावी आणि विधायक कार्य घडावे यासाठी आम्ही आग्रही आहोत.
