राज्याच्या अनेक भागात अवकाळी पाऊस आणि गारपीटीचा तडाखा

मुंबई – राज्याच्या अनेक भागात अवकाळी पाऊस आणि गारपिटीने हजेरी लावली आहे. त्यामुळे शेतपिकांचे मोठ्या प्रमाणात नुकसान झाल्याचे शेतकऱ्यांकडून सांगितले जात आहे. काढणीला आलेली पिकेच या पाऊस आणि गारपीटीत लक्ष्य ठरली आहेत.

वाशीम जिल्ह्यातल्या मंगरूळ, कारंजा, मालेगाव, रिसोड मानोरा आणि वाशीम तालुक्यात काल रात्री वादळी -वारा,तसंच गारा पडल्यामुळे गहू, ज्वारी, हरभरा या पिकासह फळबागा आणि भाजीपाल्याचं प्रचंड नुकसान झालं. जिल्ह्यातला वीज पुरवठा मध्यरात्री उशिरापर्यंत बंद होता.

वर्धा जिल्ह्यातल्या सिंदी, आर्वी आणि कारंजा तालुक्यात झालेल्या वादळी वाऱ्यासह पावसामुळे चणा, गहू पपई, संत्रा उत्पादकांचे मोठे नुकसान झाले आहे. कापणी करून ठेवलेला गहू, चणाही पावसामुळे भिजला. तालुका प्रशासनाच्या सूचनेवरून सध्या महसूल आणि कृषी विभागाकडून युद्धपातळीवर नुकसानीच्या सर्वेक्षणासह पंचनामे केली जात आहेत.

बुलढाणा जिल्हयातल्या बुलडाणा, खामगाव, चिखली, देऊळगाव राजा,शेगाव, संग्रामपूर, शेगाव सह मोताळा सिंदखेड राजा या तालुक्यातल्या अनेक गावांमध्ये काल संध्याकाळी  विजेच्या कडकडाटासह अवकाळी पाऊस कोसळला.

परभणीत सोनपेठ तालुक्यातल्या उक्कडगाव ते वडगावच्या परिसरात काल सायंकाळी विजांच्या कडकडाटासह वादळी वारे आणि गारांसह मुसळधार पाऊस झाला तर गंगाखेड-परळी या रस्त्यावरच्या  सोनपेठ हद्दीतल्या उक्कडगाव पासून, नैकोटवाडी, करम, ते गंगाखेड पासून दहा किलोमीटर अंतरावरील वडगावपर्यंत वादळी वारे, गारांचा पाऊस पाऊस सुरू होता.

नाशिक आणि धुळे जिल्ह्याच्या अनेक भागात जोरदार अवकाळी पाऊस आणि गारपीटीने तडाखा दिला आहे. काढणीला आलेला उन्हाळ कांदा, काढणीसाठी सज्ज असलेली द्राक्ष आणि अन्य पिकांवर याचा मोठा परिणाम झाला आहे.