अबब! तब्बल १६ फुटांचा किंग कोब्रा; वनकर्मचाऱ्यांचा निघाला चांगलाच घाम

नवी दिल्ली – आसामच्या नागाव येथे एका चहाच्या मळ्यात तब्बल १६ फूट लांब किंग कोब्रा सापडला. जवळपास २० किलो वजनाचा हा कोब्रा पकडण्यासाठी वनकर्मचाऱ्यांना खूप परिश्रम करावे लागले.

येथील चहाच्या मळ्यात काम करणाऱ्यांनी हा कोब्रा पाहिला, आणि त्यांना धडकीच भरली. त्यांनी लागलीच वनविभागाच्या कर्मचाऱ्यांना याची कल्पना दिली. वन विभागाने देखील तातडीने हालचाल करत चहाच्या मळ्याकडे धाव घेतली. हा विषारी साप पकडण्यासाठी या कर्मचाऱ्यांना मळ्यातच उतरावे लागले.

१६ फूट लांब हा कोब्रा पकडताना हे वनकर्मचारी चांगलेच घामाघूम झाले. कारण, हा कोब्रा लांबलचक तर होताच पण त्याचे वजनही तब्बल २० किलो एवढे होते. शिवाय, पकडताना चिडून डसला तर काय, हे देखील एक संकट होतंच. पण, हा साप पकडण्यासाठी बोलावण्यात आलेले पथक एकदम सतर्क होते. त्यामुळे अखेर या सापाला पकडून जंगलात सोडण्यात आले. आणि साऱ्यांनी नि:श्वास सोडला.

या सापाला पकडल्यानंतर त्याला बघण्यासाठी गावकऱ्यांची मोठीच गर्दी उसळली होती. सापांमध्ये किंग कोब्रा हा सर्वाधिक विषारी मानला जातो. असं म्हणतात की, कोब्राचं एकदा भरपेट जेवण झालं की, दोन अडीच आठवडे तो जेवणाशिवाय राहू शकतो.