इंडिया दर्पण ऑनलाईन डेस्क – छोट्या पडद्यावरील मालिका या घराघरात अत्यंत लोकप्रिय असतात. त्यातही काही मालिका या कितीही काळ लोटला तरी प्रेक्षकांचे मनोरंजन करण्यात यशस्वी ठरतात. यातच पहिल्या क्रमांकावर असलेली मालिका म्हणजे ‘तारक मेहता का उल्टा चष्मा’. गेली अनेक वर्षे ही मालिका प्रेक्षकांचे मनोरंजन करते आहे. काळाच्या ओघात अनेक कलाकार ही मालिका सोडून गेले, काही कलाकारांनी निर्मात्यांवर आरोप केले. दिशा वाकानी अर्थात दयाबेन पुन्हा एकदा मालिकेत येणार असल्याच्या चर्चा सुरू आहेत. तशा बातम्या देखील येत आहेत.
या मालिकेतील जेठालाल, दयाबेन, टप्पू यासारख्या व्यक्तिरेखा प्रेक्षकांच्या नेहमीच चर्चेचा आणि कुतूहलाचा विषय राहिल्या आहेत. सहा वर्षांपासून दयाबेन फेम दिशा वकानी तारक मेहतापासून लांब आहे. ती पुन्हा या मालिकेत येणार अशा बातम्यांना उधाण आले आहे. ‘तारक मेहता का उल्टा चष्मा’ मालिकेचे निर्माते असित मोदी यांनी यावेळी ही माहिती दिली आहे. दयाबेन म्हणून प्रसिद्ध असलेली दिशा वकानी पुन्हा तारक मेहतामध्ये दिसणार आहे. मी खात्रीनं सांगतो की, दयाबेन लवकरच प्रेक्षकांचे मनोरंजन करताना दिसेल, असेही ते म्हणाले आहेत. यानंतर चाहत्यांनी दयाबेनवर कौतुकाचा वर्षाव केला आहे.
टीव्ही मनोरंजन विश्वात सर्वाधिक टीआरपी घेणारी मालिका म्हणून ‘तारक मेहता का उल्टा चष्मा’चे नाव आवर्जून घ्यावे लागेल. ही मालिका नेहमीच वेगवेगळ्या कारणांमुळे चर्चेचा विषय राहिली आहे. त्यातील पात्रे ही चाहत्यांच्या कुतूहलाचा विषय आहेत. या मालिकेची प्रेक्षकसंख्याही मोठी आहे. त्या पात्रांशी चाहत्यांचे एक प्रकारचे भावनिक नाते तयार झाले आहे. त्यामुळे यातील कोणतेही पात्र मालिकेत न दिसल्यास चाहत्यांची निराशा होते.
२०१७ पासून मॅटर्निटी लिव्हवर असल्याचे सांगून दिशा वकानीने ‘तारक मेहता का उल्टा चष्मा’मधून बाहेर पडण्याचा निर्णय घेतला होता. चाहते बऱ्याच दिवसांपासून आपल्या आवडत्या अभिनेत्रीची उत्सुकतेनं वाट पाहत आहेत. दयाबेन मालिकेतून गेल्यापासून प्रेक्षकांनी देखील खूपच तीव्रपणे आपल्या भावना सोशल मीडियावर व्यक्त केल्या होत्या.
