नवी दिल्ली – दक्षिण अफ्रिकेविरोधात सुरू असलेल्या एकदिवसीय तीन सामन्यांच्या मालिकेत दुसऱ्या सामन्यात पाकिस्तानचा पराभव झाला. यजमानांनी हा सामना १७ धावांनी जिंकून मालिकेत १-१ अशी बरोबरी केली आहे. प्रथम फलंदाजी करताना दक्षिण अफ्रिकेने कर्णधार तेंबा बवुमाच्या ९२ आणि क्विटन डी कॉकच्या ८० धावांच्या जोरावर ६ गडी बाद ३४१ धावा केल्या होत्या. प्रत्युत्तरात पाकिस्तानचा संघ ९ गड्यांच्या मोबदल्यात ३२४ धावा करू शकला. १९३ धावा कुटणाऱ्या फखर जमांला सामनावीर म्हणून निवडण्यात आले.
पाकिस्तान क्रिकेट संघाने नाणेफेक जिंकून गोलंदाजी करण्याचा निर्णय घेतला. यजमानांच्या संघाकडून डी कॉक आणि डीन एल्गर यांनी ५५ धावांची भागिदारी केली. त्यानंतर कर्णधार बवुमाने डावाला सावरले आणि धावफलक हलता ठेवून १६९ धावापर्यंत पोहोचवले. डी कॉक ८० धावा काढून बाद झाला. बवुमाचे शतक ८ धावांनी हुकले. वान डे डुसेन आणि डेव्हीड मिलर यांनी धडाकेबाज फलंदाजी करून अर्धशतके केली. अशा रितीने अफ्रिकेच्या संघाने ६ गडी गमावून ३४१ धावांचा डोंगर उभारला.
पाकिस्तानच्या डावाची खराब सुरुवात झाली. पहिला गडी केवळ ७ धावांवर बाद झाला. त्यानंतर ७० धावांवर कर्णधार बाबर आझम बाद झाला. त्यानंतर लगेचच मोहम्मद रिझवान माघारी परतला. त्यानंतर ठराविक अंतरात पाकिस्तानचे गडी बाद होत गेले. दुसऱ्या बाजूला फखर जमाला दक्षिण अफ्रिकेच्या गोलंदाजांचा सामना करत राहिला. १५५ चेंडूंचा सामना करताना त्याने १९३ धावा कुटल्या. त्यात १८ चौकार आणि १० षटकारांचा समावेश आहे. परंतु तो आपले द्विशतक करू शकला नाही. एक धाव घेण्याचा प्रयत्न करताना तो शेवटच्या षटकात बाद झाला. फखर याने आपल्या एकदिवसीय सामन्यांच्या कारकीर्दीत ही दुसर्यांदा मोठी धावसंख्या केली आहे. २०१८ मध्ये झिम्बांब्वेविरुद्ध त्याने २१० धावा केल्या होत्या.
