स्मार्ट हेल्मेटने केले ८ हजार २५० नागरिकांचे स्क्रिनिंग,  १०३ संशयित शोधले

नाशिक – भारतीय जैन संघटना (बीजेएस) यांच्या तर्फे स्मार्ट हेल्मेट द्वारे दिंडोरी रोड वरील बाजार समितीच्या भाजीपाला यार्डात नागरिकांची थर्मल स्क्रीनिंग रविवारी दुसऱ्या दिवशी ही करण्यात आले. सकाळी ११ ते २ व दुपारी ४ ते ६:३०  या वेळेत ८ हजार २५० च्या वर नागरिकांचे स्क्रीनिंग होऊन  १०३ लोकांना संशयित म्हणून स्मार्ट हेल्मेट तंत्रज्ञानाने शोधून काढण्यात आले. अशा संशयित ५८ लोकांची अँटीजेन चाचणी होऊन  ९ रुग्ण पॉझिटिव्ह आढळून आलेत. दोन दिवसात १३ हजार ४५० नागरिकांचे  थर्मल स्क्रिनिंग करण्यात आले व तसेच मिशन झिरो अंतर्गत आजपावेतो एकूण ५५४१० अँटिंजेन चाचण्या होऊन ८६४६ पॉझिटिव्ह रुग्ण शोधून काढण्यात यश आल्याची माहिती प्रकल्प संयोजक नंदकिशोर सांखला यांनी दिली.

स्मार्ट हेल्मेट कॅमेराद्वारे १८० डिग्री मध्ये येणाऱ्या प्रत्येक व्यक्तीचे छायाचित्र टिपत थर्मल स्क्रीनिंग करते. त्यातून शरिराचे तापमान समजते व थर्मल इमेज हेल्मेट तंत्रज्ञाला दिसते. क्यूआर कोड आणि मोबाईल अँप्लिकेशनला सुद्धा जोडण्याची सुविधा यात आहे. नाशिक मधील कोरोनाचा वाढता संसर्ग लक्षात घेता भारतीय जैन संघटनेने स्मार्ट हेल्मेट उपलब्ध करून दिले आहे.

नाशिक महानगरपालिका, भारतीय जैन संघटना,  वॉटर ग्रेस कंपनी व विविध स्वयंसेवी व्यक्ती, संघटना यांचे पुढाकाराने सुरु करण्यात आलेल्या “मिशन झिरो नाशिक” या एकात्मिक कृती योजनेच्या ४२ व्या दिवशी फक्त मार्केट यार्ड पंचवटी या ठिकाणीच स्मार्ट हेल्मेट द्वारे स्क्रीनिंग करण्यात आले. आता पुढील दिवसात शहरातील सर्व भाजी बाजार व गर्दीच्या बाजार पेठा या ठिकाणी स्मार्ट हेल्मेट द्वारे मास थर्मल स्क्रीनिंग केले जाणार आहे.