अहमदाबाद – काँग्रेस अध्यक्ष सोनिया गांधी यांचे सल्लागार आणि काँग्रेस पक्षातील ज्येष्ठ व विश्वासू नेते अहमद पटेल यांचे निधन झाले. त्यांचे पुत्र फैजल पटेल यांनी तशी माहिती दिली आहे. मध्यरात्री साडेतीन वाजता अहमद पटेल यांची प्राणज्योत मालवली. शरीरातील अनेक अवयव निकामी झाल्याने त्यांचे निधन झाले. महिन्याभरापूर्वी त्यांना कोरोनाची लागण झाली होती. शासकीय नियमानुसार त्यांच्या पार्थिवावर अंत्यसंस्कार केले जाणार असून कुणीही गर्दी करु नये, असे आवाहन फैजल पटेल यांनी केले आहे. गेल्या अनेक दशकांपासून ते राजकारणात सक्रीय होते. सोनिया गांधी यांनी घेतलेल्या अनेक निर्णयांमध्ये त्यांचा मोठा वाटा होता. त्यांच्या निधनाने राजकारणातील मोठे व्यक्तिमत्व हरपल्याची भावना व्यक्त केली जात आहे.
