नाशिक ः राज्यातील सहकार क्षेत्रातील ज्येष्ठ नेते आणि जिल्हा बँकेचे माजी उपाध्यक्ष किसनलाल बोरा यांचे निधन झाले. कादवा सहकारी साखर कारखान्याचे संस्थापक संचालक, वणी व्यापारी बँकेचे संस्थापक चेअरमन, जिल्हा नागरी बँक असोसिएशनचे माजी अध्यक्ष, माजी विशेष कार्यकारी दंडाधिकारी, श्री वर्धमान स्थानकवासी जैन श्रावक संघाचे माजी विश्वस्त अशा विविध संस्थांचे ते पदाधिकारी होते. सहकार क्षेत्रातील अर्थतज्ञ म्हणून सर्वदूर त्यांची ख्याती होती. वणी गावाच्या जडणघडणीत त्यांनी मोलाचे योगदान दिले. त्यांच्या निधनाने वणी गावाची आणि सहकार क्षेत्राची अपरिमित हानी झाल्याच्या प्रतिक्रीया अनेक मान्यवरांनी व्यक्त केल्या आहेत.
