सर्व खासगी हॉस्पिटलमध्ये मिळणार लस; २४ तासात ५० लाख जणांची नोंदणी

नवी दिल्ली – कोरोना निर्मुलनासाठी सुरू झालेल्या लसीकरणाला देशातील जनतेचा प्रतिसाद लक्षात घेऊन पंतप्रधान नरेंद्र मोदी यांनी आता सर्व खासगी रुग्णालयांनाही लसीकरणासाठी मुभा दिली आहे. त्यासाठी सरकारने ठरवून दिलेल्या नियमांचे पालन खासगी रुग्णालयांना करावे लागेल.

नरेंद्र मोदी यांनी लस घेतल्यानंतर जनतेलाही आवाहन केले होते. त्यानंतर अवघ्या एक दिवसात पोर्टलवर 50 लाख लोकांनी नोंदणी केली. सध्या 60 वर्षांवरील नागरिक व 45 ते 60 वयोगटातील गंभीर आजारांनी ग्रस्त असलेल्यांना लस दिली जात आहे. 

आता यात सर्व खासगी रुग्णालयांना लसीकरण केंद्र म्हणून काम करण्याची जबाबदारी देण्यात आली आहे. मात्र त्यासाठी कर्मचाऱ्यांची संख्या, रुग्णालयातील जागा, उपचाराची व्यवस्था आदी बाबींचे निकष ठरवून देण्यात आले आहेत. 

मंत्रालयाने राज्य आणि केंद्र सरकारच्या लसीकरण अभियान तीन आरोग्य योजनांच्या पॅनमध्ये सामील आणि निर्धारित निकषांचे पालन करणाऱ्या रुग्णालयांच्या क्षमतेचा जास्तीत जास्त वापर करण्यास सांगितले आहे. या योजनांमध्ये आयुष्यमान भारत, पंतप्रधान जन आरोग्य योजना, केंद्र सरकार आरोग्य योजना आणि राज्य आरोग्य विमा योजनांचा समावेश आहे. 

आतापर्यंत लसीकरण अभियानात 26 ते 27 हजार रुग्णालय सामील आहेत. त्यातील 12 हजार 500 रुग्णालय खासगी आहेत. आरोग्य सचिव राजेश भूषण आणि लसीकरण प्रशासनाचे अध्यक्ष डॉ. आर.एस. शर्मा यांनी सर्व राज्यांचे मुख्य सचिव, प्रधान सचिव आणि आरोग्य सचिवांना व्हिडीयो कॉन्फरन्सद्वारे सूचना दिल्या. 

राज्यांनी व्हॅक्सीन साठवून ठेवू नये कारण त्याची कमतरता भासू देणार नाही, असेही केंद्राने स्पष्ट केले आहे. मंगळवारी सायंकाळी 7 पर्यंत 54 लाख 61 हजार 864 लोकांना व्हॅक्सीन देण्यात आले आहे. यात पहिला आणि दुसरा डोज घेणारे, असे दोन्ही सामील आहेत.

कोव्हीनवर डेटा सुरक्षित

केंद्रीय आरोग्य सचिवांनी म्हटले आहे की कोव्हीनच्या पहिल्या टप्प्यात काही अडचणी आल्या होत्या. मात्र आता कोव्ही 2.0 मध्ये कुठलीही अडचण नाही, शिवाय यात डेटा सुरक्षित राहील याची पूर्ण काळजी घेण्यात आली आहे. यात लाभार्थ्यांचे नाव, वय आणि लिंग अशी माहिती घेतली जात आहे.