नवी दिल्ली – इंधन दरवाढीच्या विरोधात विरोधकांनी गदारोळ केल्यामुळे संसदेच्या दोन्ही सभागृहांचं कामकाज आधी दुपारी १२ वाजेपर्यंत, नंतर दुपारी २ वाजेपर्यंत आणि त्यानंतर दिवसभरासाठी स्थगित करण्यात आलं.
आज सकाळी कामकाज सुरु होताच पेट्रोल डिझेल तसंच गॅस सिलेंडरची दरवाढ मागे घेण्याची मागणी विरोधकांनी केली. काँग्रेस, डावे पक्ष द्रमुक, राष्ट्रवादी काँग्रेस आणि शिवसेनेसह इतर विरोधी पक्ष सदस्यांनी सभापतींसमोरच्या मोकळ्या जागेत येऊन घोषणाबाजीला सुरुवात केली.
लोकसभेचे सभापती ओम बिर्ला यांनी सदस्यांनी जागेवर जाण्याचं आवाहन करून प्रश्नोत्तराचा तास सुरु केला. मात्र गदारोळ कायम राहिल्यामुळे लोकसभेच कामकाज स्थगित करण्यात आलं. राज्यसभेतही हिच परिस्थिती निर्माण झाल्यामुळे उपाध्यक्ष हरीवंश यांनी २ वेळा आणि अंतिमतः दिवसभरासाठी कामकाज स्थगित केलं.
