वाशिम – अनेक कुटुंबातील लोक अजूनही वंश चालवण्यासाठी मुलगा हवा याचा अट्टहास करत असतात. आजच्या काळात मुली कोणत्याच क्षेत्रात मागे नाहीत. मोठ्या पदांवर महिला सन्मानानं काम करत आहेत. याचं उत्तम उदाहरण दाखवून दिलं आहे वाशिम जिल्ह्यातील मंगरूळपीर तालुक्याच्या तर्हाळाच्या तीन मुलींनी. वाघमारे कुटुंबातल्या तिन्ही मुलींनी पोलिस सेवेत दाखल होऊन आपण मुलांपेक्षा कमी नाही हेच दाखवून दिलं आहे.
नारायण वाघमारे यांच्या चार भावांमध्ये मिळून ४ एकर शेती आहे. प्रत्येक भावाला एक एकर शेती आल्यामुळे कुटुंबाचा उदरनिर्वाह करणं कठीण जातं. त्यामुळे वाघमारे कुटुंब मजुरी करतं. प्रिया, भाग्यश्री, श्रद्धा अशी तिन्ही मुलींची नावं आहेत.
नारायण वाघमारे यांनी कधीही मुली असल्याचा राग केला नाही किंवा त्यांचा कामासाठी आधार घेतला नाही. तिन्ही मुलींना बारावीपर्यंत शिक्षण दिलं. मोठी मुलगी प्रियानं पोलिसांत जाण्याचा निर्णय घेतला. वडिलांच्या विरोधानंतर समाजाची चिंता होती. लोक काय म्हणतील, पोलिस खात्याबद्दल समाजात अनेक गैरसमज आहेत, ते कसे दूर करायचे, मुलीसाठी क्षेत्र योग्य असेल का या सर्व गोष्टींवर मात करत प्रिया २०१४ मध्ये पोलिस दलात दाखल झाली.
