नाशिक – नाशिक रोड परिसरातील शिंदे गावात एका वृद्धाला तीन ते चार जणांनी सोमवारी (१५ फेब्रुवारी) रात्री साडेनऊच्या सुमारास मारहाण केली. या मारहाणीत त्यांचा मृत्यू झाला आहे. याप्रकरणी नाशिक रोड पोलिस ठाण्यात गुन्हा नोंदवण्यात आला आहे.
पोलिसांनी दिलेल्या माहितीनुसार, भास्कर शिवराम साळवे (वय ६०, राहणार शिंदेगाव, नायगाव रोड, नाशिक) यांना सोमवारी रात्री त्यांच्या घराजवळ देवीदास साळवे, आझाद पाटील, प्रफुल्ल पाटील आणि इतरांनी लाथाबुक्क्यांनी मारहाण केली. या मारहाणीत त्यांच्या छातीत आणि पोटात दुखापत झाली. त्यांना जिल्हा रुग्णालयात दाखल केले असता वैद्यकीय अधिकारी डॉ. कांबळे यांनी त्यांना मृत घोषित केलं. भास्कर साळवे यांचा मुलगा संदीप साळवे यांच्या फिर्यादीनुसार, नाशिक रोड पोलिसांत गुन्हा दाखल झाला आहे. नाशिक रोड पोलिस अधिक तपास करीत आहेत.
