नाशिक : शहरात वाहनचोरट्यांचा धुमाकूळ कायम असून, विविध उपनगरांमधून सर्रास वाहने लंपास होत असल्याचे निदर्शनास येत आहे. शहराच्या तीन भागांतून तीन वाहनांची चोरी झाली आहे. या प्रकरणी सातपूर, अंबड व पंचवटी पोलीस ठाण्यात गुन्हा दाखल करण्यात आला आहे.
सातपूर कॉलनीतील आनंद छाया बसथांबा परिसरात राहणारे छबुराव भिकाजी साळुंखे (रा.स्वरूप विद्या अपा.) यांची तवेरा एमएच ०४, एफझेड ६०८८ मंगळवारी (दि.२८) चोरट्यांनी त्यांच्या सोसायटीच्या पार्किंगमधून चोरून नेली. या प्रकरणी सातपूर पोलीस ठाण्यात गुन्हा दाखल करण्यात आला असून, अधिक तपास उपनिरीक्षक पाटील करीत आहेत. दुसरी घटना सिडकोत घडली. साईबाबानगर भागात राहणारे पवन बापू पारधी यांनी या प्रकरणी तक्रार दाखल केली आहे. पारधी यांची मालवाहू रिक्षा एमएच १५, बीजे ४९८६ मंगळवारी (दि.२८) रात्री त्यांच्या घरासमोर लावलेली असताना चोरट्यांनी पळवून नेली. या प्रकरणी अंबड पोलीस ठाण्यात गुन्हा दाखल करण्यात आला असून, अधिक तपास पोलीस नाईक गवळी करीत आहेत. तर पेठ रोडवरील शाहूनगर भागात राहणारे अमित शिवकुमार सोनी शनिवारी (दि.२५) कामानिमित्त गोदाघाटावर गेले होते. रामकुंड परिसरातील साईमंदिराजवळ पार्क केलेली त्यांची बॉक्सर एमएच १५, एटी ८१९८ मोटारसायकल चोरट्यांनी चोरून नेली. या प्रकरणी पंचवटी पोलीस ठाण्यात गुन्हा दाखल करण्यात आला असून, अधिक तपास हवालदार ढुमसे करीत आहेत.
