मुंबई – अमेरिकेचे राष्ट्राध्यक्ष ज्यो बायडन यांच्या पत्नी अर्थात अमेरिकेच्या प्रथम महिला डॉ. जिल बायडन यांनी व्हॅलेंटाईन डे साजरा करण्यासाठी व्हाईट हाऊसच्या लॉनला ह्रदयाच्या आकाराच्या शुभेच्छा पत्रांनी सजविले आहे. राष्ट्राध्यक्ष जो बायडन यांच्यासोबत डॉ. जिल देखील माध्यमांशी बोलत होत्या. त्यावेळी त्यांना व्हॅलेंटाईन डे च्या तयारीविषयी विचारण्यात आले. बायडन यांनी हा दिवस मोठा आहे आणि जिलचा सर्वांत आवडता दिवस आहे, असे उत्तर दिले.
डॉ. जिल बायडन यांनीही माध्यमांच्या प्रश्नांना उत्तरे दिली. कश्यामुळे त्यांना सजावट करण्याची प्रेरणा मिळाली याबाबतही त्यांनी माहिती दिली. राष्ट्राध्यक्ष बायडन आणि त्यांच्या पत्नीसोबत यावेळी त्यांचे पाळीव कुत्रे चॅम्पियन आणि मेजर देखील उपस्थित होते. जिल म्हणाल्या, कोरोना महामारीमुळे प्रत्येकजण निराश आहे. अशात थोडा आनंद पेरण्याचा माझा प्रयत्न आहे. यातून एक आशा आणि विश्वास निर्माण व्हावा, एवढाच उद्देश आहे.
