पिंपळे खुर्द उपकेंद्र सुरु करुन वीज उपलब्ध करुन देण्याची आमदार नितीन पवारांची सूचना
कळवण – कळवण तालुक्यात गेल्या काही दिवसापासून सुरळीत वीज मिळत नसल्याने संतप्त झालेल्या शेतकऱ्यांनी वीज पुरवठा सुरळीत करावा मागणीसाठी शेतकऱ्यांचा महावितरणपुढे ठिय्या मांडला. महावितरणच्या यंत्रणेला पिंपळे खुर्द उपकेंद्र सुरु करुन शेतकऱ्यांना वीज उपलब्ध करुन देण्याची सूचना आमदार नितीन पवारांची केल्यानंतर ठिय्या आंदोलन मागे घेण्यात आले.
वीज वितरण कंपनीकडून मागील काही दिवसापासून कळवण तालुक्यात कृषिपंप आणि गावांना सुरळीत वीजपुरवठा मिळत नसून वारंवार वीज पुरवठा खंडित होत असल्यामुळे पिकांना पाणी कसे द्यावे असा प्रश्न शेतकऱ्यांसमोर पडल्याने कनाशी पश्चिम पट्ट्यातील शेतकऱ्यांनी कळवण पंचायत समितीचे उपसभापती विजय शिरसाठ यांच्या नेतृत्वाखाली कळवणच्या महावितरण कार्यालयासमोर तासभर ठिय्या मांडून वीज पुरवठा सुरळीत करण्याची मागणी केली.
दरम्यान आमदार नितीन पवार यांनी पिंपळे खुर्द येथे नव्याने उभारलेले वीज उपकेंद्र तात्काळ सुरु करुन तेथून शेतकऱ्यांना सुरळीत वीज पुरवठा उपलब्ध करुन द्या, पर्यायाने इतर भागातील वीजेचा वाढलेला दाब कमी होऊन वीज पुरवठा सुरळीत होण्यास मदत होईल त्यामुळे उदघाटन होईल तेव्हा होईल. आत्ता शेतकऱ्यांना सुरळीत वीज देण्याच्या सूचना आमदार पवारांनी महावितरणच्या यंत्रणेला केल्यानंतर शेतकऱ्यांनी ठिय्या आंदोलन मागे घेतले.
कळवण तालुक्यातील कृषी पंपाची वीजेची मागणी वाढली असल्यामुळे तालुक्यात ठिकठिकाणी वारंवार वीज पुरवठा खंडीत होत असल्यामुळे पिकांना पाणी देणे अवघड होऊन बसले आहे. कळवण तालुक्यात पाण्याअभावी पिके वाळण्याची भिती आहे. शेतकरी महावितरणचे वेळेवर वीज बिल भरत असून सुरळीत व अखंड वीज पुरवठा मिळत नसल्याने महावितरण विरोधात शेतकऱ्यांचा मोठ्या प्रमाणात रोष आहे.
सध्या रब्बीचा हंगाम सुरु असून शेतात पीक उभे आहे. वीज पुरवठा सुरळीत मिळत नसल्यामुळे पाण्याअभावी पिके हातातून जाण्याची भिती निर्माण झाली आहे. या पार्श्वभूमीवर शेतकऱ्यांना सुरळीत वीज पुरवठा उपलब्ध करुन द्यावा आणि वीज पुरवठा खंडित होऊ नये यासाठी महावितरणने उपाययोजना करावी अशी शेतकऱ्यांची अपेक्षा आहे. वीज पुरवठा सुरळीत मिळत नसल्याने तालुक्यातील शेतकरी मोठ्या संकटात सापडले आहेत .
एकीकडे शेतातील पिकांना पाणी देता येईना अन दुसरीकडे अनेक गावात वीज पुरवठ्याअभावी पाणीटंचाई निर्माण झाली असल्याने शेतकरी व सर्वसामान्यांना दुहेरी संकटाचा सामना करावा लागत असल्याची परिस्थिती असल्यामुळे नव्याने कार्यन्वित करण्यात येणाऱ्या पिंपळे खुर्द वीज उपकेंद्रातून वीज पुरवठा कार्यन्वित केल्यास अन्य भागातील वीजेचा दाब कमी होण्यास मदत होऊन तालुक्यात वीज पुरवठा सुरळीत होण्यास मदत होणार आहे.
