नवी दिल्ली – भारतीय क्रिकेट संघाचा कर्णधार विराट कोहली याची पत्नी आणि अभिनेत्री अनुष्का शर्मा हिने सोमवारी एका मुलीला जन्म दिला. आपल्या आयुष्यातील हा खास प्रसंग विराटने लगेचच त्याच्या चाहत्यांसोबत शेअर केला. अनुष्का आणि आमची छोटी परी एकदम व्यवस्थित असल्याचेही त्याने यावेळी सांगितले होते. चाहतेही या बातमीमुळे आनंदात असून आता या मुलीचे नाव कोण ठेवणार याची सर्वांना उत्सुकता आहे.
मिळालेल्या माहितीनुसार, विरुष्काच्या मुलीचे नाव बाबा अनंत महाराज ठेवणार आहेत. या दोघांच्या आयुष्यातील प्रत्येक महत्त्वाच्या प्रसंगी अनंत महाराज यांचा उल्लेख असतोच. याआधी त्यांच्या लग्नाच्या आणि नवीन घर खरेदीवेळी त्यांचे नाव ऐकण्यात आले होते. आता या नवीन परीचे नाव काय ठेवले जाते याची साऱ्यांनाच उत्सुकता आहे.
गेल्यावर्षी 27 नोव्हेंबर रोजी विराट आणि अनुष्काने एक फोटो शेअर करत नवीन पाहुण्याच्या आगमनाची बातमी चाहत्यांना दिली होती. आणि ती वेळ जवळ आल्याने ऑस्ट्रेलियाविरुद्ध पहिला कसोटी सामना खेळून विराट मायदेशी परतला होता.
