मुंबई – अभिनेता सुशांत सिंह राजपूतच्या आत्महत्येच्या प्रकरणात संशयाच्या घेऱ्यात असलेली अभिनेत्री रिया चक्रवर्ती हिचे आयुष्य एका वर्षात पूर्णपणे बदलले आहे. अर्थात दिग्दर्शक रुमी जाफरीने रिया लवकरच पुन्हा मोठ्या पडद्यावर दिसणार असल्याचेही स्पष्ट केले आहे.
मात्र रिया कोणत्या चित्रपटाद्वारे कम बॅक करेल, हे रुमीने स्पष्ट केलेले नाही. स्वतःच्या चित्रपटातून रियाला पुढे आणणार की आणखी कोण्या दिग्दर्शकासोबत रियाची बोलणी सुरू आहे, हे कळू शकलेले नाही. एका मुलाखतीदरम्यान रुमीने काही बाबी पुढे आणल्या. सुशांत आणि रियाच्या अत्यंत जवळच्या मित्रांपैकी एक म्हणजे रुमी जाफरी. काही दिवसांपूर्वीच रुमीने रियाची भेट घेऊन तिचे सांत्वन केले आणि लवकरच तिचे पुनरागमन होईल, असा दिलासाही दिला. एवढेच नव्हे तर चित्रपटसृष्टीने तिचे खुल्या दिलाने स्वागत करेल, असा विश्वासही रुमीने व्यक्त केला. रुमी म्हणतात की, ‘रिया हल्ली फार शांत झालेली आहे. फारच कमी बोलते. ज्या परिस्थितीतून तिला जावे लागले त्यात तिचा काहीही दोष नव्हता. वातावरण शांत झाल्यानंतर रिया अनेक गोष्टींचा खुलासा करेल,’ असेही रुमी म्हणाले.
ते म्हणाले, ‘हे वर्ष रियासाठी अत्यंत कठीण गेले. अर्थात हे वर्ष सर्वांसाठीच वाईट होते मात्र रियासाठी जरा जास्तच वाईट ठरले. एका मध्यमवर्गिय कुटुंबातील तरुणी अख्खा एक महिना कारागृहात घालवते तेव्हा तिच्या मनावर काय परिणाम झाला असेल, याचा आपण विचारही करू शकत नाही. या घटनेने तिचे मनोबल पूर्णपणे खचले आहे. मात्र तरीही रिया या वर्षी लवकरच पडद्यावर परत येईल.’ मुख्य म्हणजे रियाचा एक चित्रपट बनून तयार आहे, मात्र तो प्रदर्शित झालेला नाही. रुमी जाफरीच्याच ‘चेहरे’ या चित्रपटात रियाची मुख्य भूमिका आहे. हा चित्रपट कोरोनामुळे प्रदर्शित होऊ शकलेला नव्हता. मात्र आता आता निर्माते एक पाऊल मागे गेले आहेत. या सिनेमात अमिताभ बच्चन, इम्रान हाश्मी आणि क्रिस्टल डिसोझासारखे दिग्गज कलावंत असले तरीही रियाची भूमिका असल्यामुळे वाद होईल, असे निर्मात्यांचे म्हणणे आहे.
