नवी दिल्ली – एकदम ब्रॅण्डेड मोबाइलसाठी ओळखल्या जाणाऱ्या वन प्लसने आता आपले स्मार्ट वॉचही बाजारात आणले आहे. वन प्लस ९ सिरीजच्या लाँचिंगदरम्यानच त्यांनी वन प्लस वॉचही लाँच केले आहे. या स्मार्ट वॉचच्या माध्यमातून त्यांनी आता वेअरेबल सेगमेंटमध्ये देखील पाऊल टाकले आहे. या स्मार्ट वॉचची सगळ्यात महत्त्वाची खासियत म्हणजे, हे वॉच टीव्हीला कनेक्ट होऊ शकतं. आणि याच्या सहाय्याने आपण टीव्हीचा आवाज कमी जास्त करू शकतो.
भारतात हे घड्याळ १६ हजार ९९९ रुपयांना मिळणार आहे. भारतीय वेबसाईटवर मात्र याची किंमत १४ हजार ९९९ रुपये दाखवली जात आहे. काळ्या आणि पांढऱ्या अशा दोन रंगात हे घड्याळ उपलब्ध आहे. गोल डायल असलेल्या या घड्याळाच्या साईड पॅनलवर दोन बटणे आहेत.
या डायलची साईज ४६ मिमी. एवढी आहे. तर १.९ इंची एमोलेड डिस्प्ले आहे. यात युझर्सना ५० हून अधिक वॉच फेस मिळतील. आपल्या आवडीनुसार हे सेट करणे आपल्याला शक्य आहे. त्याचबरोबर आजच्या काळात आरोग्य टिकवण्याची असलेली गरज पाहता, या स्मार्ट वॉचमध्ये हार्ट रेट मॉनिटरिंग आणि रक्तातील ऑक्सिजन लेव्हल मोजता येईल, अशी सुविधा उपलब्ध करून दिली आहे.
याचे सगळ्यात खास फीचर म्हणजे हे स्मार्ट वॉच टीव्हीशी कनेक्ट होऊ शकतं. त्यामुळे आवाज कमी – जास्त करण्यासाठी याचा फायदा होऊ शकतो. तुम्ही जर टीव्ही पाहता पाहता झोपून गेलात, तर हे घड्याळ टीव्ही बंद करण्याइतपत ‘स्मार्ट’ आहे. मात्र, हे फीचर काही ठरावीक टीव्ही मॉडेलमध्येच उपलब्ध आहे. याची बॅटरी देखील चांगली असून एकदा चार्ज केले की दोन आठवडे पुन्हा काही बघण्याची आवश्यकता नाही.
