राष्ट्रवादी महिला शहर काँग्रेसचा दिवाळी निमित्त एक पणती, एक साडी भेट उपक्रम

या उपक्रमाबाबत बोलतांना शहराध्यक्ष अनिता भामरे म्हणाल्या की,  कोरोना रोगाने थैमान घातले. दुर्दैवाने भारतात महाराष्ट्रामध्ये  कोरोना रोगामुळे सर्व सामान्य जनता हवालदिल झाली. संपूर्ण देशभरात या रोगाने अनेक लोकांचे प्राण घेतले तर अनेकांनी आपल्या नोक-या गमावल्या. कित्येकांचे संसार उदध्वस्त झाले. यामुळे गेल्या नऊ महिन्यांपासून कोरोना मुळे लोकांना सण उत्सव देखील साजरे करता आले नाही. शासनाने जनतेला घालून दिलेल्या नियमांचे तंतोतंत पालन केल्याने आजतरी महाराष्ट्रात कोरोना रूग्णांची संख्या दिवसेंदिवस झपाट्याने कमी होतांना दिसत आहे ही त्यातली समाधानाची बाब आहे. आजपर्यंत जसे प्रत्येक उत्सव महाराष्ट्रातील जनतेने शांतपणे पार पाडले तसेच आता दिवाळी देखील आम्हाला शांततेत आणि आनंदात पार पाडायची आहे. अंधारातून प्रकाशाकडे वाटचाल करणारे पर्व म्हणून दिवाळी या सणाचे महत्व अधोरेखित आहे. दिवे लावून किंवा थाळ्या वाजवून कोरोना वर मात करता येणार नाही हे आता आपल्याला कळून चुकले आहे. तेव्हा एकमेकांचे हातात हात घेऊनच यापुढची वाटचाल करावी लागेल हे सत्य नाकारता येणार नाही.