नवी दिल्ली : अयोध्येत भगवान रामांचे भव्य मंदिर उभे राहावे यासाठी ‘राम मंदिर निधी समर्पण’ अभियान सुरू झाले आहे. यासाठी आपण एक लाख रुपये देणार असल्याची घोषणा अभिनेत्री प्रणिता सुभाष हिने केली आहे. याबाबत ट्विटरवर माहिती देतानाच तिने इतरांनाही समर्पण करण्याचे आवाहन केले आहे. तिचे हे आवाहन आतापर्यंत २८ लाखांहून अधिकवेळा लोकांनी पाहिले आहे. दरम्यान, राम मंदिरासाठी विश्व हिंदू परिषदेचे कार्यकर्ते निधी गोळा करणार आहेत.
कन्नड चित्रपट ‘राम अवतार’मध्ये प्रणिता सुभाष हिची भूमिका आहे. याचबरोबर ‘भुज: द प्राईड ऑफ इंडिया’ या चित्रपटातही ती दिसणार आहे. तिच्याशिवाय या चित्रपटात अजय देवगणची प्रमुख भूमिका आहे. याचबरोबर प्रियदर्शनच्या ‘हंगामा २’ मध्ये ती परेश रावल आणि शिल्पा शेट्टीसोबत दिसेल.
