येवला – तालुक्यात कोळम येथे एक दुर्दैवी घटना घडली आहे. वडील ट्रॅक्टर चालवत असतांना मुलाला ट्रॅक्टरवर बसवण्याचा हट्ट त्यांना चांगलाच महागात पडला. ट्रॅक्टर चालवत असताना बारा वर्षाचा पोटचा गोळा कधी ट्रॅक्टर खाली आला हे वडलांना कळलंच नाही. बुधवारी सायंकाळी पाच वाजेच्या सुमारास ही घटना घडली. कोळम येथील शेतकरी बबन हरिचंद्र चव्हाण हे आपला ट्रॅक्टर घेऊन शेतीच्या कामासाठी शेताकडे निघाले होते. दरम्यान आपला मुलगा शुभम बबन चव्हाण वय अवघे १२ वर्ष याला त्यांनी ट्रॅक्टर बसून घेतले. अचानकपणे शुभम ट्रॅक्टरवरुन पडला व ट्रॅक्टरच्या चाकाखाली आला. या घटनेची फिर्याद परसराम चव्हाण यांनी दिली आहे. पुढील तपास सहायक पोलीस उपनिरीक्षक रामनाथ तांदळकर हे करत आहेत.
