येवला – कोरोनाच्या संसर्गामुळे देशात सर्वत्र लॉक डाऊन सुरु झल्याने अनेक कंपन्या बंद पडल्या. यामुळे अनेक जणांची आर्थिक कोंडी झाली. याकाळात नाशिकमधील कंपनीतून जॉब सोडून घरी आलेल्या येवला तालुक्यातील धामणगाव येथील महेश शिवाजी गवळी या तरुणाने परिस्थितीवर मात करत स्व:ताचा एलईडी बल्प बनविण्याचा छोटा उद्योग सुरु केला. तसेच याद्वारे गावातील मित्रांना यात सहभागी करून त्यांना रोजगार उपलब्ध करुन दिला आहे.
काही तरी करायचे या विचारात असतांना शिकलेल्या इलेक्ट्रिक वायरिंगचा अनुभव पाहता त्याने साठवलेल्या पैशातून एलईडी बल्ब बनवण्याचा छोटा उद्योग घरातच सुरु केला आहे. त्यासाठी लागणारे रॉ मटेरिअल विकत आणून त्याने कामाला सुरुवात केली. तयार केलेले बल्ब विकण्यासाठी मित्रांसह ग्रामीण भागात मार्केटिंग देखील सुरु केले आहे. अल्प दरात चांगले आणि टिकाऊ बल्ब होलसेल भावात मिळत असल्याने ग्रामीण भागात त्याला चांगली मागणी येते आहे. सद्यस्थितीला महेश रोज २०० पेक्षा जास्त बल्ब तयार करतो आहे. त्याचबरोबर त्याने गावातील मित्रांना याद्वारे रोजगार उपलब्ध करुन दिला आहे. कुठलातरी उद्योग सुरु करण्यापेक्षा तो ठराविक काळासाठी नसावा याकडे त्याने लक्ष दिले व दैनंदिन वापरात असलेल्या एलईडी बल्प बनविण्याचा उद्योग सुरु केल्याचे त्याने सांगितले. नोकरी गमावल्याचे दुःख न गोंजारता उद्योजकतेद्वारे आत्मनिर्भर होण्याकडे वाटचाल सुरु केली आहे.
