येवला – तालुक्यात रविवारी सायंकाळी दोन वेगवेगळे अपघात झाले. त्यात दोन जण ठार तर पाच जण जखमी झाले आहेत. मृत व्यक्तींमध्ये आडगाव चोथवा येथील जिल्हा परिषद शाळेच्या प्रभारी मुख्याध्यापक विजय लक्ष्मण वाघमोडे (५२, रा. कोटमगाव विठ्ठलाचे) यांचा समावेश आहे. अनकाई शिवारातील कसारखेडा फाट्यावर एक अपघात झाला. त्यात इंडिका कार (एमएच १९ बीजे ५२६६) आणि एका दुचाकीत (एमएच १५ एफइ ८७५५) समाेरासमाेर अपघात झाला. या अपघातात वाघमोडे यांचा मृत्यू झाला. त्यांच्या पत्नी रत्ना वाघमोडे (वय ४६) आणि पाच वर्षांची नात गंभीर जखमी झाली आहे. त्यांच्यावर मनमाड व मालेगाव येथील हॉस्पिटलमध्ये उपचार सुरू आहेत.
दुसऱ्या अपघातात सायगाव फाट्यावर दोन मोटारसायकलमध्ये समोरासमोर धडक झाली. त्यात धामणगाव येथील चंद्रकांत बाळाजी सोनवणे (२५) जागीच ठार झाले तर योगेश पगारे जखमी झाले. तसेच सायगाव येथील दोन जण जखमी झाले.
