नवी दिल्ली – अमेरिकेतील बायडेन सरकारमध्ये मूळ भारतीय वंशाच्या अनेक व्यक्ती दिसतात. त्यांना देण्यात आलेली जबाबदारी देखील महत्त्वाची आहे. याच यादीत आता आणखी एक नाव जोडलं गेलं आहे, ते म्हणजे किरण आहुजा यांचं.
पेशाने वकील असलेल्या किरण या मानवाधिकार कार्यकर्त्या आहेत. कर्मचारी वर्गाशी संबंधित विभागाच्या प्रमुख म्हणून किरण यांना बायडेन यांची निवड केली आहे.
किरण यांना ज्या विभागासाठी नामांकित करण्यात आलेले आहे, तो विभाग, अमेरिकेतील २० लाख प्रशासकीय अधिकाऱ्यांचा आहे. सिनेटच्या मान्यतेनंतर हे पद सांभाळणाऱ्या त्या पहिल्या भारतीय ठरल्या आहेत. ओबामा यांच्या मंत्रिमंडळातही किरण यांचा समावेश होता. त्यामुळे बायडेन यांच्यासोबत काम करणे हे काही त्यांच्यासाठी नवीन नाही.
यापूर्वी किरण यांनी २०१५ ते २०१७ या काळात याच कार्यालयात चीफ ऑफ स्टाफ म्हणून काम केले आहे. प्रशासकीय सेवेचा त्यांना जवळपास १० वर्षांचा अनुभव आहे. अमेरिकेतील कायदा विभागातून एक वकील म्हणून त्यांनी आपल्या करियरला सुरुवात केली होती. एक तडफदार महिला अधिकारी अशीच त्यांची आजपर्यंतची प्रतिमा आहे.
जर या पदावरील त्यांच्या नेमणुकीला सिनेटने मान्यता दिली, तर ट्रम्प यांच्या अनेक धोरणात त्या बदल करू शकतात. किरण यांनी जॉर्जिया विद्यापीठातून राज्यशास्त्राची पदवी घेतली आहे. आणि मग कायद्याचा अभ्यास करून, त्याचीही पदवी घेतली आहे.
