सूरत – गुजरातमधील सरदार वल्लभभाई पटेल राष्ट्रीय माहिती तंत्रज्ञान संस्थेचा (एसव्हीएनआयटी) १८ वा दीक्षांत समारंभ नुकताच पार पडला. यात बीटेक मेकॅनिकल अभियांत्रिकीचा विद्यार्थी मौलिक थुमर याने तब्बल सुवर्णपदके मिळवत प्रथम क्रमांक पटकाविला. विशेष म्हणजे त्याचे वडिल हे सर्वसाधारण कामगार असूनही त्यांनी आपल्या मुलाला इंजिनिअर बनविले. मौलिकने कठोर मेहनत घेऊन हे यश मिळविले आहे.
समारंभात ११८० विद्यार्थ्यांना पदवी वाटप करण्यात आल्या. यापैकी ७२० विद्यार्थी बीटेक, २६२ एमटेक, ८७ डॉक्टरेटचे विद्यार्थी आहेत. या व्यतिरिक्त २६ विद्यार्थ्यांना सुवर्ण पदके प्रदान करण्यात आली. कोरोना संसर्गाच्या पार्श्वभूमीवर अनेक विद्यार्थ्यांना या सोहळ्यासाठी आमंत्रित केले गेले नव्हते. वेबसाइटवर ऑनलाइन कार्यक्रमाचे आयोजन करण्यात आले होते. मौलिक थुमर यांनी पदवीदान कार्यक्रमांमध्ये प्रथम क्रमांक मिळविला. एकूण संस्थेत अव्वल स्थान मिळविण्यासाठी मौलिकने ५ सुवर्णपदके जिंकली.
मौलिकने सांगितले की, सन २०१६ मध्ये त्याला जेईई परीक्षेमध्ये १३००० वा क्रमांक मिळाला होता. वास्तविक त्याला मॅकेनिकल इंजिनिअरिंगमध्ये प्रवेश हवा होता. परंतु त्याला सिव्हील अभियांत्रिकीमध्ये प्रवेश मिळाला, तो पुढे म्हणाला की, माझे वडील कमलेशभाई हे डायमंड कामगार आहेत. त्याचा पगार दरमहा १५ हजार रुपये आहे. उच्च शिक्षणाचे वार्षिक शुल्क १ लाख ३० हजार रुपये होते. माझ्या वडिलांनी फक्त आठवीपर्यंत शिक्षण घेतले होते, परंतु त्यांनी मला अभियंता व्हावे हे पहावेसे वाटले. आज त्याचे स्वप्न पूर्ण झाले. संस्थेला अव्वल क्रमांक मिळाला आहे. ४ वर्षे अभ्यास करून मी वार्षिक साडेसहा लाख रुपयांच्या पॅकेजवर नोकरी सुरू केली आहे.
