नाशिक – म्हसरूळ शिवारातील पवार मळ्यालगत एका महिलेचा खुन करण्यात आला आहे. याप्रकरणी म्हसरुळ पोलिसांनी महिलेच्या पतीला चौकशीसाठी ताब्यात घेतले आहे. त्याची कसून चौकशी सुरू आहे. मृत महिलेचे नाव पुजा विनोद आखाडे (वय २३) असे आहे.
म्हसरुळ पोलिसांनी दिलेल्या माहितीनुसार, मखमलाबादला जाणाऱ्या रस्त्यावर असलेल्या पवार मळ्याजवळ मंगळवारी रात्रीच्या सुमारास एका महिलेचा मृतदेह रक्ताच्या थारोळ्यात असल्याचे एका नागरिकाला दिसला. त्याने तत्काळ पोलिसांना माहिती दिली. त्याची दखल घेत वरिष्ठ पोलीस निरीक्षक पंढरीनाथ ढोकणे हे हवालदार संजय राऊत, सतीश वसावे, मंगेश दराडे आदींच्या पथकासह घटनास्थळी पोहचले. येथील नाल्याजवळ २० ते २५ वयोगटातील विवाहित महिला रक्ताच्या थारोळ्यात मृतावस्थेत पडलेली पोलिसांना आढळून आली.
या महिलेच्या गळ्यावर, कपाळावर तसेच पोटावर धारदार शस्त्राने वार करुन ठार मारल्याचे पोलिसांनी पंचनाम्यात निष्पन्न केले. महिलेची ओळख रात्री उशिरापर्यंत पटलेली नव्हती. मृतदेहाची ओळख पटविण्यासाठी म्हसरुळ पोलिसांनी अन्य पोलीस ठाण्यांना कळविले. त्याचवेळी रात्री उशिरा पंचवटी पोलीस ठाण्यात विनोद आखाडे नावाची व्यक्ती त्याची पत्नी बेपत्ता झाल्याने तक्रार देण्यासाठी आला. पोलिसांनी त्याला घेऊन घटनास्थळ गाठले व मृतदेह दाखविल्यानंतर मृतदेह त्यांनी ओळखला व विवाहितेचे नाव स्पष्ट केले. पूजाचा खून कोणी व का केला असावा? याबाबतचे कारण आतापर्यंत स्पष्ट होऊ शकलेले नाही. या खुनाचा उलगडा करण्यासाठी म्हसरुळ पोलिसांचे पथक तपास करत आहेत. दरम्यान, विनोद यास पोलिसांनी चौकशीसाठी ताब्यात घेतले आहे.
