मुंबई : बॉलिवूडचे महानायक अमिताभ बच्चन सोशल मीडियावर भलतेच ऍक्टिव्ह असतात. पण नुकतेच ते चाहत्यांकडून मोठ्या प्रमाणावर ट्रोल झाले. त्यांनी आपला एक फोटो शेअर केला. फोटो तर चाहत्यांना खूप आवडला, पण त्याखाली लिहिलेली ओळ काही त्यांच्या पचनी पडली नाही. ‘या जगात लोकांकडे चिक्कार वेळ आहे, हे मात्र नक्की’, अशी कॅप्शन अमिताभ बच्चन यांनी आपल्या या फोटोला दिली आहे. या ओळीवरूनच त्यांच्यावर टीकेची झोड उठली आहे.
या ओळीवर प्रतिक्रिया देताना एक चाहता म्हणतो, तुमचं म्हणणं बरोबर आहे सर. लोकांकडे असलेल्या या वेळेचाच फायदा तर तुम्ही आयुष्यभर घेत आला आहात. तर दुसरा एकजण म्हणतो की, आमच्याकडे वेळ आहे, म्हणून तुम्हा लोकांचे व्यवसाय सुरु आहेत. नाहीतर वेळ आणि पैसे खर्च करून कोण आलं असतं ? आज जी श्रीमंती तुम्ही अनुभवता आहात, ती आमचीच देन असल्याचेही त्याने म्हटले आहे. अमिताभ बच्चन सध्या ‘कौन बनेगा करोडपती १२’ च्या चित्रीकरणात व्यस्त आहेत.
