म्यानमारमध्ये पोलिस गोळीबारात १८ नागरिक ठार; राजदूतालाही हटवले

     संयुक्त राष्ट्रांच्या मानवी हक्क कार्यालयाने आंदोलकांच्या हत्येच्या घटनेबद्दल शोक व्यक्त करतांना पोलिसांच्या या कारवाईचा तीव्र निषेध केला आहे, तसेच शांततावादी मार्गाने निषेध करणार्‍या लोकांवर गोळबार करणाऱ्या पोलिसांवर कारवाईची मागणी केली.  त्यांनी सैन्यदलाविरोधात कठोर कारवाईची मागणी करत तातडीने लोकशाही व्यवस्था पूर्ववत करण्याचे आवाहन  जागतिक समुदायाला केले आहे. तर दुसरीकडे बंडखोर नेत्या ऑंग सॅन सू की यांच्या अटकेपासून म्यानमारमध्ये निषेध सुरूच आहे.

     नोव्हेंबरच्या निवडणुकीत सू की यांच्या पक्षाने भरीव विजय मिळविला होता, परंतु लष्कराने हा निकाल जाहीर करण्यास नकार दिला होता. रविवारी या यंगॉन शहरासह देशातील विविध भागात लोकशाही समर्थक रस्त्यावर उतरले.  यावेळी ठिकठिकाणी  आंदोलकांना पांगवण्यासाठी पोलिसांनी स्टेन ग्रेनेड, अश्रुधुराचे गोळे फेकत हवेत गोळीबार केला. तरीही आंदोलकांनी हार मानली नाही, तेव्हा पोलिसांनी गुप्तपणे आंदोलकांना लक्ष्य केले.

या उठावानंतर आतापर्यंत झालेल्या निषेधार्थ आंदोलनात २१ लोकांचा मृत्यू झाला आहे. बहुतेक देशांकडून म्यानमारमधील उठावचा निषेध करण्यात आला आहे, परंतु चीनच्या भूमिकेवर प्रश्न उपस्थित झाले आहेत.