मालेगाव : मालेगाव येथून सूरतकडे लग्नाची वऱ्हाड घेऊन जाणा-या लक्झरी बसचा भीषण अपघात गुजरातमधील तापी जिल्ह्यात वालोद गावाजवळ व्यारा-बाजीपुरा राष्ट्रीय महामार्गावर शुक्रवारी पहाटे झाला. या अपघातात चार जणांचा जागीच मृत्यू झाला तर अनेक जण जखमी झाले आहे. मालेगावातील हजार खोली परिसरातून हे वऱ्हाड लग्नासाठी सूरतकडे निघाले होते. आज दुपारी हे लग्न होणार होते. मात्र रस्त्यातच हा अपघात झाला. ही लक्झरी बस भरधाव वेगाने जात होती. त्यावेळेस एका पार्क केलेल्या ट्रकला जाऊन ती आदळली. त्यामुळे हा अपघात झाला. हा अपघात इतका भीषण होता की, वऱ्हाडाची लक्झरी बस अर्धी कापली गेली. या अपघातात मृताचा आकडा वाढण्याची शक्यता आहे. दरम्यान जखमींना रुग्णालयात दाखल करण्यात आले आहे.
