नांदगाव – मानवधन सामाजिक शैक्षणिक विकास संस्थेतर्फे, सामाजिक व शैक्षणिक क्षेत्रात उल्लेखनीय कार्य केल्याबद्दल डाॅ. यशवंत बर्वे यांना जीवनगौरव पुरस्काराने सन्मानित करण्यात आले आहे.
अतिदुर्गम आदिवासी, दुष्काळी भागात जाऊन विनामूल्य आरोग्य सेवा देणे, अन्नदान करणे, आर्थिक मदत करणे, या माध्यमातून डाॅ.यशवंत बर्वे यांनी समाजातील तळागाळातील लोकांना समाजाच्या मुख्य प्रवाहात आणण्याचा सातत्याने प्रयत्न केला. तसेच आदिवासी बांधवांच्या विकासासाठी विविध उपक्रम राबवित आले आहेत. शैक्षणिक क्षेत्रात होत असणार्‍या बदलांचा पाठपुरावा करून, भविष्यातील शैक्षणिक धोरणाबद्दल मार्गदर्शन व दिशादर्शनाचे भरीव कार्य डाॅ. यशवंत बर्वे यांचेकडून झाले आहे.
महात्मा गांधी, डाॅ. बाबासाहेब आंबेडकर, विनोबा भावे अशा थोर देशभक्तांचा परीस सहवास लाभलेल्या आणि कवीवर्य कुसुमाग्रज उर्फ तात्यासाहेब शिरवाडकर, बाबा आमटे व न्यायमूर्ती चंद्रशेखर धर्माधिकारी यासारखे स्नेही लाभलेल्या या बहुआयामी व्यक्तित्वाने समाजासाठी आपले संपूर्ण आयुष्य समर्पित केले आहे.
वयाच्या ९१ व्या वर्षीही डाॅ. यशवंत बर्वे यांच्याकडे असलेले विशेष ज्ञान व अनुभव समाजाला आजही उपयुक्त आहे. या कार्यकर्तृत्वाचा यथोचित सन्मान करण्याहेतू मानवधन संस्थेचे संस्थापक श्री. प्रकाश कोल्हे व सचिव सौ. ज्योती कोल्हे यांच्या हस्ते डाॅ. यशवंत बर्वे यांना जीवनगौरव पुरस्कार प्रदान करण्यात आला.
या पुरस्कार सोहळ्याप्रसंगी डॉ विजय बर्वे डाॅ. अश्विनीकुमार भारद्वाज व डाॅ. मृणाल भारद्वाज, माधुरी माटे, मुक्तेश्वर मुनशेट्टीवार, डॉ अंजली बर्वे, डॉ.अनिल बर्वे हेमलता बीडकर, अनिल कोल्हे व समस्त बर्वे परिवार उपस्थित होते.
