सिडनी – ऑस्ट्रेलियाच्या पूर्वेकडील भागात सतत मुसळधार पाऊस पडत असून महापूर येत आहे. किनाऱ्यालगतच्या भागात महापुरामुळे नवीनच समस्या भेडसावत असून या पाण्यातून साप आणि मोठे मासे रहिवासी भागात येत आहेत. अनेक विषारी साप घरात शिरल्याने नागरिक भयभित झाले आहेत.
पोर्ट मॅकक्वेरी येथील व्यावसायिक स्टुअर्ट जॉन्सन यांनी सांगितले की, पाण्याची पातळी प्रचंड वाढल्यामुळे सर्व प्रकारचे वन्यजीव रहिवासी भागात येत आहेत. ऑस्ट्रेलियाच्या उत्तर-उत्तर किनाऱ्यावर सापांच्या २० पेक्षा जास्त प्रजाती आहेत, त्यातील अनेक विषारी असून यात तपकिरी साप आणि लाल-काळा साप यांचा समावेश आहे.
हवामान खात्याच्या म्हणण्यानुसार, येत्या आठवड्याच्या अखेरपर्यंत मुसळधार पाऊस आणि जोरदार वारा येण्याची शक्यता आहे. त्यामुळे लोकांना धोकादायक परिस्थितीबद्दल जागरुक राहण्याचा इशारा देण्यात आला आहे.
स्थानिक भागात मुसळधार पाऊस आणि तुफान वादळी वारा यांचा इशारा देण्यात आला असून येत्या काही काळात चक्रीवादळ येण्याची देखील शक्यता आहे. यंदा ऑस्ट्रेलियामधील महापुराने १०० वर्षांचा विक्रम मोडला आहे.
सिडनीच्या कित्येक भागात अतिवृष्टीची भीती लक्षात घेता दुसरीकडे जाण्याचे आदेश देण्यात आले आहेत. तसेच या महापुरामुळे शेकडो घरांचे नुकसान झाले आहे. अनेक मोठे रस्ते बंद करण्यात आले असून विद्यार्थ्यांना शाळेत येण्यास मनाई आहे.
टीव्ही आणि सोशल मीडियावर पुराचे अनेक व्हिडिओ समोर आले असून इथल्या नुकसानीचा अंदाज या व्हिडिओंमधून काढता येतो. सिडनी शहरासाठी पाण्याचे मुख्य स्त्रोत असलेले वारागंबा धरण अनेक वर्षांनंतर प्रथमच ओसंडून वाहत आहे. सिडनीच्या उत्तरेकडील भागातील पुरामुळे शेकडो लोकांनी मदत शिबिरात आश्रय घेतला आहे.