ममतांच्या पुतण्या आणि सुनेला CBI ची नोटीस; राजकारण तापले

कोलकाता ः बेकायदेशीररित्या कोळसा उत्खनन आणि तस्करी प्रकरणाची चौकशी करणाऱ्या सीबीआयने मुख्यमंत्री ममता बॅनर्जी यांचा खासदार पुतण्या आणि तृणमूल काँग्रेस युवक अध्यक्ष अभिषेक बॅनर्जी तसेच त्यांची पत्नी रुजिरा बॅनर्जी यांना चौकशीसाठी नोटीस पाठवली आहे.

कालीघाट विभागात असलेल्या अभिषेक बॅनर्जी यांच्या शांतिनिकेतन या निवासस्थानी सीबीआयचं पथक रविवारी पोहोचलं. आधी अभिषेक यांना नोटीस पाठवल्याची बातमी आली. पण नंतर सांगण्यात आलं की, ती नोटीस त्यांची पत्नी रुजिरा यांच्या नावानं आली आहे.

त्यावेळी रुजिरा निवासस्थानी नव्हत्या. त्यामुळे सीबीआयच्या अधिकार्यांनी नोटीस निवासस्थानी देऊन सोबत फोन नंबरही दिला आणि सांगितलं, की जेव्हा कधी त्या येतील त्यांनी सीबीआयला फोन करावा. परंतु रात्री उशिरापर्यंत त्यांनी सीबीआयला फोन केला नाही.

अभिषेक यांच्या पत्नीला कलम १६० अंतर्गत साक्षीदार म्हणून जबाब नोंदवण्यासाठी नोटीस जारी केल्याचं सीबीआयच्या सूत्रांनी सांगितलं. कोळसा घोटाळ्यात आर्थिक देवाणघेवाण केल्याबाबत सीबीआयला महत्त्वाची माहिती मिळाली आहे, ज्यामध्ये रुजिरा यांचं नावही समोर आलं आहे. त्याबाबतच सीबीआयला रुजिरा बॅनर्जी यांची चौकशी करायची आहे. त्यांना सीबीआयच्या कार्यालयात उपस्थित न राहता घरीच जबाब नोंदवण्यासाठी सवलत देण्यात आली आहे.