खा. डॉ. भारती पवार यांची केंद्रीय राज्यमंत्र्यांशी चर्चा
नाशिक – शेतकऱ्यांकडे अद्यापही मका विक्रीसाठी असून ऑनलाईन अडचणीही त्यास कारणीभूत आहेत. त्यामुळे मका खरेदीची अधिक क्षमता वाढवावी, अशी मागणी खासदार डॉ. भारती पवार यांनी केंद्रीय राज्यमंत्री रावसाहेब दानवे यांच्याकडे केली आहे.
केंद्र सरकार मार्फत महाराष्ट्र राज्यातील शेतकऱ्यांच्या हिताच्या दुष्टीने वारंवार मका खरेदी क्षमता वाढवून देण्यात आली. परंतु अद्याप देखील अनेक शेतकऱ्यांकडे मोठ्या प्रमाणात चांगल्या प्रतीची मका शिल्लक आहे. ज्यावेळी ऑनलाईन मका खरेदी पोर्टल बंद पडले त्यावेळी मोठ्या संख्येने नावे नोंदविलेल्या शेतकऱ्यांनी खा. डॉ. भारती पवार यांच्याकडे धाव घेतली. त्यानुसार डॉ. पवार यांनी केंद्रीय राज्यमंत्री रावसाहेब दानवे यांच्याशी भ्रमणध्वनीद्वारे तत्काळ संपर्क करून शेतकऱ्यांच्या व्यथा त्यांच्याकडे मांडल्या. यावेळी दानवे यांनी सांगितले की, महाराष्ट्र सरकारने मका खरेदीसाठी वाढीव प्रस्ताव केंद्राकडे पाठवावा जेणेकरून केंद्र सरकार शेतकऱ्यांच्या हितासाठी सकारात्मक निर्णय घेईल.
आजपर्यंत केंद्राकडून खरेदी क्षमता वाढवून देण्यात आली त्याचा शेतकऱ्यांना मोठ्या प्रमाणात दिलास मिळाला आहे. त्याबद्दल दानवे यांचे डॉ. पवार यांनी आभार व्यक्त केले. तसेच, मका खरेदी क्षमता वाढविण्यासाठी पवार यांनी दानवे यांना निवेदन दिले आहे. तसेच, राज्य सरकारलाही डॉ. पवार यांनी पत्र दिले आहे.
