सोलापूर – पुणे-सोलापूर हायवेवरील वरवडे टोलनाक्या जवळ टेम्पोने वाहतूक पोलिसाला चिरडल्याची घटना घडली आहे. वाहतूक पोलिसाने टेम्पो चालकाला वाहन थांबविण्याचा इशारा केला. पण, त्याने वाहन न थांबविता थेट पोलिसाच्या अंगावरच वाहन नेले. या दुर्घटनेत पोलिस नाईक सागर चौबे या वाहतूक पोलिसाचा मृत्यू झाला आहे.
पोलिसांनी दिलेल्या माहितीनुसार, औषधे घेऊन जाणारा टेम्पो (एमएप ०४ एचडी ०१७०) हा हैदराबादहून मुंबईकडे जात होता. वरवडे टोलनाक्याजवळ हा टेम्पो आला. यावेळी वाहतूक पोलिस चौबे यांनी या टेम्पोला थांबण्याचा इशारा केला. मात्र, वाहनचालक नवनाथ गुट्टे याने थेट चौबे यांच्या अंगावरच टेम्पो चालवला. या दुर्घटनेत चौबे यांचा जागीच मृत्यू झाला. या अपघातानंतर गुट्टे याने पळून जाण्याचा प्रयत्न केला. मात्र, स्थानिक तरुणांनी पोलिसांच्या मदतीने त्यास पकडले.
दरम्यान, या घटनेमुळे पोलिसांवरील हल्ल्यांचा प्रश्न पुन्हा ऐरणीवर आला आहे. तसेच, या अपघातामुळे सर्वत्र खळबळ उडाली आहे.
