मुंबई – भारतीय क्रिकेट संघाचा मुख्य वेगवान गोलंदाज जसप्रित बुहराह याने इंग्लंड विरुद्धच्या चौथ्या आणि अखेरच्या कसोटीसाठी टीममधून आपले नाव मागे घेतले आहे. पण घाबरू नका, बुमराहने नाव मागे घेण्याचे कारणही गोड आहे. त्याने खासगी कारण दिले असले तरीही खरे कारण लग्नाचे आहे.
कसोटी मालिका संपल्यानंतर १२ मार्चपासून पाच टी-२० सामन्यांची मालिका होणार आहे. त्यातही बुमराहला विश्रांती देण्यात आली आहे. त्यानंतर दोन्ही संघ २३ मार्चपासून एकदिवसीय सामन्यांची मालिका खेळतील. त्यातूनही बुमराहला बाहेर ठेवले जाण्याची शक्यता आहे. बुमराह येत्या आठवड्यात लग्न करणार असून हा सोहळा गोव्यात होणार आहे. अर्थात बीसीसीआयला खरे कारण सांगण्यात आले आहे.
एका स्पोर्ट्स अँकरसोबत बुमराहचे लग्न होत आहे, असेही सूत्रांकडून कळते. या विवाह सोहळ्याच्या तारखेबाबतही गुप्तता पाळण्यात येत आहे. विशेष म्हणजे सध्या इंग्लंडविरुद्धची मालिकी सुरू असल्यामुळे भारतीय क्रिकेट संघातील बुमराहचे सहकारी विवाह सोहळ्याला उपस्थित राहू शकणार नाहीत, हे जवळपास निश्चित झाले आहे.
बुमराह मुळचा अहमदाबादचा असला तरीही त्याचे कुटुंब मात्र मुंबईत वास्तव्याला आहे. कोरोनाचा वाढता प्रकोप लक्षात घेता कमी लोकांमध्ये हा सोहळा घ्यायचा आहे. त्यामुळेच गोव्याला आयोजन करण्याचा निर्णय कुटुंबियांनी घेतला.
भारतीय क्रिकेट संघाने इंग्लंडविरुद्ध डे–नाईट टेस्ट सिरीजमध्ये विजय प्राप्त केला. त्यात स्पिनर्ससाठी पोषक खेळपट्टी असल्यामुळे बुमराहला फारशी संधी मिळाली नाही. मात्र चौथ्या टेस्टपूर्वीच बीसीसीआयने बूमराह खेळणार नाही, अशी घोषणा केल्यामुळे सारे अवाक् झाले. कारण लगेच टी-२० आणि नंतर वन–डे मालिका आहे.
अश्यात बुमराहचे असणे आवश्यक आहे. शिवाय टी-२० अहमदाबादमध्ये आणि वन–डे पुण्यात सुरू होणार आहे. पण लग्नाच्या कारणाने टी-२० मालिकेपर्यंत बुमराह संघात नसेल, असे आता बीसीसीआयने स्पष्ट केले आहे. वन–डे मालिकेच्या बाबतीत अद्याप अनिश्चितता आहे.
