फोन नाशिक – पे कस्टर केअर मधून बोलत असल्याचे भासवून महिलेच्या बँक खात्यातील रक्कम लांबविली

महिलेच्या बँक खात्यावर भामट्यांचा डल्ला
नाशिक : फोन पे कस्टर केअर मधून बोलत असल्याचे भासवून भामट्यांनी महिलेच्या बँक खात्यातील दोन हजाराची रोकड ऑनलाईन लांबविल्याचा प्रकार समोर आला आहे. याप्रकरणी इंदिरानगर पोलीस ठाण्यात फसवणुक आणि आयटी अ‍ॅक्टनुसार गुन्हा दाखल करण्यात आला आहे. प्रिती दिनेश सोनवणे (रा.कृष्णाप्राईड श्रीनगर,पाथर्डी शिवार) यांनी याप्रकरणी तक्रार दाखल केली आहे. गेल्या सोमवारी (दि.८) ही घटना घडली. साायंकाळच्या सुमारास सोनवणे या आपल्या घरात घरकाम करीत असतांना ८३८९०१९१०८ या भामट्या क्रमांक धारकाने त्यांच्याशी संपर्क साधला. फोन पे कस्टमर केअर मधून बोलत असल्याचे भासवून भामट्याने बोलण्यात गुंतवुन बँक खात्याची गोपनिय माहिती मिळवून हा डल्ला मारला. बँक खात्यातून १ हजार ९४० रूपयांची रोकड संशयीतांनी ऑनलाईन लांबविले. अधिक तपास वरिष्ठ निरीक्षक माईनकर करीत आहेत.

……

घरात घुसून दांम्पत्यास मारहाण
नाशिक : दुकाना समोर दुचाकी लावल्याचा जाब विचारल्याने संतप्त त्रिकुटाने घरात घुसून दांम्पत्यास बेदम मारहाण केल्याची घटना भगुर येथील सुभाषरोड भागात घडली. याप्रकरणी देवळाली कॅम्प पोलीस ठाण्यात गुन्हा दाखल करण्यात आला आहे. मोहन यशवंत राजगुरू,भुषण राजगुरू व गिरीष उर्फ शिरीष राजगुरू (रा.भगुर, ता.जि.नाशिक) अशी दांम्पत्यास मारहाण करणा-या संशयीतांची नावे आहेत. याप्रकरणी जागृती सचिन राजगुरू (रा.सुभाषरोड) यांनी तक्रार दाखल केली आहे. सचिन नंदकिशोर राजगुरू हे गेल्या गुरूवारी (दि. ११) रात्री सचिन किराणा दुकानात असतांना संशयीत भुषण राजगुरू याने आपली दुचाकी दुकानाच्या बोर्डजवळ पार्क केली. यावेळी सचिन राजगुरू यांनी त्यास दुचाकी काढण्यास सांगितल्याने दोघांमध्ये वाद झाला. त्यानंतर सचिन राजगुरू आपल्या घरी गेले असता भुषणसह उर्वरीत संशयीतांनी त्यांचे घर गाठून दाम्पत्यास लोखंडी रॉडने मारहाण केली. या घटनेत सचिन राजगुरू यांच्या बेडरूमचा दरवाजा तोडून टोळक्याने त्यांना घराबाहेर ओढून आणत मारहाण केल्याने ते जखमी झाले असून अधिक तपास सहाय्यक निरीक्षक गिते करीत आहेत.

…….

चक्कर येवून पडल्याने कैद्याचा मृत्यु
नाशिक : चक्कर येवून पडल्याने कैद्याचा मृत्यु झाला. ही घटना नाशिकरोड येथील मध्यवर्ती कारागृहात घडली. याप्रकरणी नाशिकरोड पोलीस ठाण्यात मृत्युची नोंद करण्यात आली आहे.
मनू उर्फ मनोजकुमार सुर्यप्रसाद सरजुप्रसाद राव (४५) असे मृत कैद्याचे नाव आहे. मनू राव सोमवारी (दि.१५) सायंकाळच्या सुमारास अचानक आपल्या बॅरेक क्र.३ मध्ये चक्कर येवून पडला होता. या घटनेत त्याच्या तोंडास दुखापत झाल्याने त्यास तात्काळ कारागृह रूग्णालयात प्रथमोपचार करून जेल अंमलदार किशोर पवार यांनी जिल्हा रूग्णालयात दाखल केले. उपचारापूर्वी वैद्यकीय सुत्रांनी त्यास मृत घोषीत केले. अधिक तपास उपनिरीक्षक भालेराव करीत आहेत.