जळगाव – जामनेर येथे माजी मुख्यमंत्री व विरोधी पक्षनेते देवेंद्र फडणवीस ग्लोबल महाराष्ट्र रुग्णालयाच्या उदघाटनासाठी आले होते. यावेळी त्यांनी मोजक्याच आमदारांशी चर्चा केली. या चर्चेत भाजपचे ज्येष्ठ नेते एकनाथ खडसे यांचाच विषय प्रमुख होता. या कार्यक्रमात खडसे यांनी जाणे टाळल्यामुळे त्यांच्या राष्ट्रवादी प्रवेशाच्या चर्चेला बळकटी मिळाल्याचे बोलले जात आहे.
खडसे यांना मोठे पदही राष्ट्रवादीत दिले जाणार असल्याची चर्चा आहे. खडसे यांनी अद्याप अधिकृत घोषणा केलेली नाही. विरोधी पक्षनेते जळगाव जिल्ह्यात आलेले असतांना भाजपपासून दोन हात दूर राहणे खडसे यांनी पसंद केले. त्यामुळे पुन्हा एकदा त्यांच्या पक्षांतराची चर्चा रंगली. त्यात राष्ट्रवादीत ते प्रवेश करणार असल्याचे स्पष्ट संकेतही मिळाले आहे. जामनेरच्या कार्यक्रमात मोठी गर्दी उसळली होती. पत्रकारांशी संवाद साधत असतांना गोंधळही उडाला. यावेळी एका पत्रकाराला थोडीशी दुखापत झाल्याचे बोलले जात आहे.
