शब्दांची रोजनिशी, घटोत्कच आणि हंडाभर चांदण्याचा प्रयोग रंगणार !
नाशिक : करोनाच्या संकटामुळे महाराष्ट्रातील रंगभूमीवरची चळवळ गेल्या सुमारे सात महिन्यांपासून थंडावलेली असताना पुणे, मुंबई, नाशिकमधील काही रंगकर्मींनी मात्र यावर मात करीत ऑनलाईनचा वापर करीत ‘डीजीटल प्रायोगिक धडपड’ सुरू केली आहे. यापैकीच कल्याण येथील अभिजीत झुंजारराव यांच्या अभिनय, कल्याण या संस्थेच्या वतीने ऑनलाईन थिएटर प्रिमिअर लीग सुरू करण्यात येऊन निवडक गाजलेल्या नाटकांचा महोत्सव आयोजित करण्यात आला आहे. १८ ऑक्टोबरपासून सुरू होणा-या या महोत्सवात पुण्याचे नाटक घर निर्मित, रामू रामनाथन दिग्दर्शित आणि अतुल पेठे दिग्दर्शित ‘शब्दांची रोजनिशी’, १९ ऑक्टोबर रोजी डॉ.आशुतोष दिवाणलिखित व अभिजीत झुंजारराव दिग्दर्शित ‘घटोत्कच’ आणि २० ऑक्टोबर रोजी नाशिकचे प्रमोद गायकवाडनिर्मित, दत्ता पाटीललिखित व सचिन शिंदे दिग्दर्शित ‘हंडाभर चांदण्या’ ही भारतभर विविध महोत्सव गाजवलेली नाटके ऑनलाईन बघण्याची संधी जगभरातील रसिकांना प्राप्त होणार आहे.
करोनाकाळात अनेक उद्योगव्यवसायांसोबतच मराठी रंगभूमीलाही मोठा फटका बसला. बॅकस्टेज आर्टीस्ट यांना सर्वाधिक फटका बसला. व्यावसायिक रंगभूमी ठप्प झाली. प्रायोगिक रंगभूमीही थांबली. संकटावर सतत मात करण्याची प्रवृत्ती कलावंतांमध्ये उपजत असते. त्यातून ऑनलाईन मंचाचा वापर करून आपल्या रसिकजनांशी मराठी नाट्यकर्मींनी वेगवेगळ्या प्रयोगाद्वारे, कल्पकतेने नवा संवादसेतू बांधण्याचे काम केले. दृकश्राव्य माध्यमाद्वारे नाटकाची अनुभूती घ्यायला मराठी रसिक तसा नाखूष असतो. परंतु या काळात नाट्यगृहांमध्ये प्रयोग करणे शक्य नसल्याने दृकश्राव्य माध्यमाद्वारे का होईना, आपली नाट्यकृती रसिकजनांपर्यंत पोहोचविण्याची धडपड अभिजीत झुंजारराव यांच्या संस्थेने सुरू केली आहे.
शब्दांची रोजनिशी
दिनांक १८ ऑक्टोबर २०२० रोजी रात्री ८ वाजता सादर होणार्या ‘शब्दांची रोजनिशी’ या नाटकात दोन कथा आहेत. जगातील कुठल्याही भाषेत असतात तशा त्या सुरस आणि चमत्कारिक आहेत. अशा कथा मनोरंजन करतात आणि क्लेशही देतात. त्या अनाकलनीय, अतर्क्य, अघटित इ. इ. असतात. त्या ख-या किंवा कल्पित असतात. अशा कहाण्यांची ही अनोखी गोष्ट आहे. एक गोष्ट मात्र निश्चितपणे सांगता येईल की शब्दांची रोजनिशी हा अस्सल नाट्यानुभव आहे. रामू रामनाथन यांनी लिहिलेले हे नाटक अमर देवगावकर यांनी अनुवादित केले आहे. प्रयोगशील नाट्यकर्मी अतुल पेठे यांनी ते दिग्दर्शित केले आहे. केतकी थत्ते आणि स्वत: अतुल पेठे यात भूमिका करीत आहेत.
घटोत्कच
दिनांक १९ ऑक्टोबर २०२० रोजी रात्री ८ वाजता सादर होणारे ‘घटोत्कच’ हे नाटक डॉ. आशुतोष दिवाण यांनी लिहिले असून अभिजीत झुंजारराव यांनी दिग्दर्शित केले आहे. महाभारतातील घटोत्कच या व्यक्तिरेखेला समकालिन वास्तवाची अदृश्य किनार देत राजकीय पक्षांच्या कार्यात जीवतोडून काम करणार्या नि शेवटी डावलल्या जाणार्या प्रत्येक कार्यकर्त्यात एक घटोत्कच असतोच, हे अधोरेखित केले आहे. भीम आणि हिडींबा यांचा पुत्र असलेला घटोत्कच महाभारतातील युद्धात ओढला जातो आणि लढतानाही हिंसा, राजकारण, आपल्याच वाटणार्या माणसांची अनाकलनीय वागणूक हे पहातो. युद्धज्वरात सज्जन वाटणारे राज्यकर्तेही किती निष्ठूर होतात किंबहुना त्यांना व्हावेच लागते,याचे या नाटकात दर्शन होते. राहूल शिरसाठ, हरीश भिसे, अभिनय तालखेडकर, राजन पंधे, ऋचिका खैरनार, श्रेयसी वैद्य यांच्या भूमिका असलेले, तसेच अनेक पुरस्कार आणि सन्मानांनी नावाजलेले हे नाटक रसिकांसाठी पर्वणी ठरेल.
हंडाभर चांदण्या
दिनांक २० ऑक्टोबर २०२० रोजी रात्री ८ वाजता या महोत्सवात सादर होणारे शेवटचे नाटक म्हणजे ‘हंडाभर चांदण्या’. या नाटकाने प्रायोगिक रंगभूमीला एक नवे वळण दिले, असे म्हटले जाते. या नाटकातून पाण्याचा अत्यंत भीषण प्रश्न वेगळ्या पद्धतीने मांडला आहे. पाण्याच्या टँकरची डोळ्यात प्राण आणून वाट पाहण्यासाठी माळावर जमलेल्या छोट्याशा दुष्काळी गावातील विलक्षण गोष्ट यात मांडली आहे. लोकसंगिताच्या प्रभावी माध्यमातून सद्यस्थितीवर साध्या जगण्यातून उपहासात्मक भाष्य करणारे हे नाटक दत्ता पाटील यांनी लिहिले असून, सचिन शिंदे यांनी दिग्दर्शित केले आहे. प्रमोद गायकवाड हे निर्माते असून, प्राजक्त देशमुख, प्रणव पगारे, दीप्ती चंद्रात्रे, गीतांजली घोरपडे, नुपूर सावजी, अरूण इंगळे, राहूल गायकवाड, राजेंद्र उगले, दत्ता अलगट, धनंजय गोसावी यांच्या भूमिका आहेत.
या महोत्सवासाठी ऑनलाईन तिकीटे पुढील लिंकवर उपलब्ध होतील : https://www.rangabhoomi.com/tpl2 अथवा संपर्क साधा 9967699959 या क्रमांकावर.
