पुणे – गरवारे महाविद्यालय येथे कोरोना रूग्णांसाठी सुरू असलेल्या कोविड उपचार केंद्रावर सेवा भावनेतून काम करणाऱ्या कार्यकर्त्यांच्या अनुभव कथनावर आधारीत “सामर्थ्य सेवेचे” या ई- बुकचे प्रकाशन प्रसिध्द उद्योजक सुधीर मेहता यांच्या हस्ते आणि समर्थ भारत पुनर्बांधणी योजनेचे संयोजक रवींद्र शिंगणापूरकर यांच्या प्रमुख उपस्थितीत डिजिटल पध्दतीने संपन्न झाले. यावेळी प्रमुख वक्ते व राष्ट्रीय स्वयंसेवक संघाचे पश्चिम प्रांत कार्यवाह डॉ. प्रवीणजी दबडघाव म्हणाले की, सध्याच्या बिकट स्थितीतील प्रश्न केवळ प्रशासन सोडवू शकणार नाही, तर प्रशासनाच्या प्रयत्नाला समाजाची जोड मिळायला हवी. तरच आपण सध्याच्या संकटावर मात करू शकू, असा विश्वास राष्ट्रीय स्वयंसेवक संघाचे पश्चिम प्रांत कार्यवाह डॉ. प्रवीणजी दबडघाव यांनी व्यक्त केला.
यावेळी पुस्तक प्रकाशना मागची भूमिका सांगण्यात आली. गरवारे महाविद्यालय येथे जनकल्याण समिती, समर्थ भारत पुनर्बांधणी योजना, पुणे महानगर पालिका आणि पुणे प्लॅटफॉर्म फॉर कोविड रिस्पॉन्स ( पीपीसीआर) या संस्थांच्या सहभागातून एक सर्व सुविधायुक्त असे कोविड आरोग्यसेवा केंद्र उभे करण्यात आले आहे. तेथे कोरोना रूग्णसेवा करत असलेले डॉक्टर, वैद्यकीय कर्मचारी, गरवारे महाविद्यालयाचे व्यवस्थापकीय अधिकारी, कर्मचारी, केंद्राला अर्थसहाय्य करणाऱ्या संस्था-संघटनांचे प्रतिनिधी आणि या कामात स्वतःला झोकून देऊन काम करणारे जनकल्याण समितीचे तरूण कार्यकर्ते या सर्वांनी कोरोना संकटाचा सामना करणाऱ्या रूग्णांना आपल्या मनःपूर्वक सेवाभावाने जिंकले असून त्यामुळे शेकडो रूग्ण बरे होवून निश्चिंत मनाने घरी गेले आहेत. याच मौलीक अनुभवांचे मोल समाजासमोर येण्यासाठी व त्यातून एक आशादायक वातावरण निर्मिती होण्यासाठी भारतीय विचार साधना आणि विश्व संवाद केंद्र यांनी “सामर्थ्य सेवेचे” या ई- बुकची निर्मिती केली.
या कार्यक्रमाचे सूत्रसंचालन सौ. अमृता खाकुर्डीकर यांनी केले व आभार देविदास देशपांडे यांनी मानले. याप्रसंगी भारतीय विचार साधनेचे विवेक जोशी, मिडिया विद्या स्टुडिओचे संचालक अजिंक्य कुलकर्णी, सामाजिक कार्यकर्ते मनोज पोचट ई. यावेळी उपस्थित होते. सदर ‘सामर्थ्य सेवेचे’ हे ई-पुस्तक वाचकांसाठी भारतीय विचार साधनाच्या www.bhavisa.org या संकेतस्थळावर मोफत उपलब्ध आहे.
