नाशिक – महाराष्ट्र शासनाच्या उच्च व तंत्रशिक्षण विभागामार्फत ‘उच्च व तंत्रशिक्षण मंत्रालय@ पुणे’ हा उपक्रम राबविला जाणार आहे. या उपक्रमाच्या माध्यमातून राज्याचे उच्च व तंत्रशिक्षण मंत्री उदय सामंत हे उच्च व तंत्रशिक्षण विभागातील मंत्रालय व संचालक स्तरावरील अधिकाऱ्यांसमवेत सावित्रीबाई फुले पुणे विद्यापीठाच्या इनडोअर हॉलमध्ये १८ फेब्रुवारी रोजी दुपारी २ वाजता प्रत्यक्ष उपस्थित राहणार आहेत. यावेळी ते उच्च व तंत्रशिक्षण क्षेत्राशी संबंधित समस्या जाणून त्या सोडविणार असल्याची माहिती नाशिक विभागाच्या प्रभारी सहाय्यक ग्रंथालय संचालक कविता महाजन यांनी एका शासकीय प्रसिध्दीपत्रकान्वये कळविले आहे.
शासकीय प्रसिद्धी पत्रकात नमूद केल्यानुसार, विद्यार्थी, पालक, शिक्षक, प्राचार्य, शिक्षकेतत्तर कर्मचारी, विद्यापीठातील कर्मचारी, वाचक, ग्रंथालयीन कार्यकर्ते व कर्मचारी शैक्षणिक संस्था आदी विविध घटकांच्या अडी-अडचणी ऐकून उच्च व तंत्रशिक्षण मंत्री उदय सामंत हे सोडविणार असल्याचेही प्रसिद्धी पत्रकात नमूद केले आहे.
प्रसिद्धी पत्रकात नमुद केल्यानुसार, सावित्रीबाई फुले पुणे विद्यापीठाने उच्च व तंत्रशिक्षण क्षेत्राशी सर्व घटकांच्या सोयीसाठी विद्यापीठाच्या www.unipune.ac.in या वेबसाईटच्या मुख्य पृष्ठावर उच्च व तंत्रशिक्षण मंत्रालय@ पुणे हे विशेष पोर्टल निर्माण केलेले आहे. या विशेष पोर्टलवर अहमदनगर व नाशिक जिल्ह्यातील नागरिकांना इंग्रजी अथवा युनिकोड मराठीतून आपले प्रश्न मांडता येणार असून निवेदनाची सॉफ्ट कॉपी जोडण्याची व्यवस्थाही करण्यात आली आहे.
त्याअनुषंगाने उच्च व तंत्रशिक्षण क्षेत्राशी संबंधित सर्व घटकांनी आपली निवेदने ऑनलाईन सादर करावेत. तसेच ज्यांना ऑनलाईन निवेदन सादर करणे शक्य होणार नाही, त्यांनीही उपस्थित राहून मंत्रीमहोदयांना आपले निवेदने सादर करावीत, असे आवाहन नाशिक विभागाच्या सहाय्यक ग्रंथालय संचालक कविता महाजन यांनी एका शासकीय प्रसिद्धी दपत्रकान्वये केले आहे.
Follow India Darpan
ताज्या बातम्या आणि चर्चांसाठी आमच्या सोशल मीडियावर जोडा!
ग्रामीण ते शहरी आणि जुन्या ते नव्या अशा सर्वच पातळीवर आम्ही विकास पत्रकारितेला अधिक महत्त्व देतो. समाजोन्नती व्हावी, लोकशाही बळकट व्हावी, अन्यायाला वाचा फोडावी आणि विधायक कार्य घडावे यासाठी आम्ही आग्रही आहोत.
