पिंपळगाव बसवंत – निफाड तालुक्यातील कारसूळ येथील जुन्या पालखेड रस्त्याच्या कामासाठी उपोषणाचे हत्यार उगारताच ८० लाखांचा प्रस्ताव सादर करण्यात आला. त्यामुळे स्वातंत्र्य मिळाल्यानंतर प्रथमच या रस्त्याचे भाग्य उजाळणार आहे.
निफाड तालुक्यातील कारसूळ येथील रस्त्याची अवस्था फार वाईट आहे. त्यातच कारसूळ ते जुना पालखेड रस्ता राज्य मार्ग – २७ ला जोडणारा (जाधव रिसोर्टजवळ निघणारा) रस्ता पावसाळ्यानंतर खराब असायचा. एखादा रूग्ण किंवा अंत्यसंस्कारासाठी मोठी गैरसोय व्हायची. परिणामी, अंत्ययात्रा स्मशानभूमीपर्यंत नेण्यासाठी तीन गावांची शिव ओलांडण्याची नामुष्की नातेवाईकांवर यायची. तसेच शेतीमाल बाजार समितीपर्यंत नेण्यासाठी फार जिकरीचे होते. याबाबत कारसूळचे माजी उपसरपंच देवेंद्र काजळे यांनी रस्त्यांसाठी अनेकदा लोकप्रतिनिधी व प्रशासनाला वारंवार पत्र, निवेदने देऊनही कार्यवाही झालेली नाही. माजी पालकमंत्री गिरीश महाजन यांनी बोलावलेल्या ३० ऑक्टोबर २०१७ च्या जनता दरबारात तत्कालीन जिल्हाधिकारी दीपेंद्रसिंह कुशवाह यांनी आश्वासन देऊनही कार्यवाही झाली नाही. त्यानंतर १५ डिसेंबर २०१८ च्या उच्च न्यायालयाच्या घटनेच्या आर्टीकल २१ नुसार तसेच रिट पिटीशन नं. ८/२००५ व रिट पिटीशन नं. ३/ २००५ जस्टीस आर.एम.लोढा यांनी नमूद केलेली आहे. सदर रिट पिटीशनचा आधार उच्च न्यायालयाने पी. आय. एल. रिट पिटीशन नं. ७१/२०१३ मध्ये घेऊन महाराष्ट्र शासनाला रस्त्यांची स्थिती सुधारण्यासाठी निर्देश दिलेले आहेत. हे निवेदन मिळताच १५ दिवसांमध्ये उच्च न्यायालयाने दिलेल्या निर्देशानुसार सदर रस्त्याबाबत कार्यवाही सुरु करावी किंवा समाधानकारक खुलासा द्यावा, यावरही कार्यालयाकडून कुठल्याही प्रकारचा खुलासा झाला नाही. तसेच २० जानेवारी २०२० रोजी पालकमंत्री भुजबळ यांना निवेदन दिल्यानंतर समाधानकारक उत्तर मिळाले. पण यावर कुठल्याही प्रकारची कार्यवाही झाली नाही. त्यामुळे काजळे यांनी २ ऑक्टोबर २०२० रोजी आपल्या कार्यालयासमोर बेमुदत उपोषण करण्याचा इशारा देताच नाशिक जिल्हा परिषद इवद विभाग क्र. ३ नाशिक अंतर्गत जिल्ह्यातील निफाड तालुक्यातील अतिरिक्त गट ब सन २०१९ – २०२० विशेष दुरूस्ती कार्यक्रमांतर्गत कारसूळ ते जुना पालखेड रस्ता सुधारणा करणे कि.मी. ०/०० ते ४/०० ग्रामा ३१५ यासाठी ८०.०० लाख रुपयांचा निधी १ कामांना मिळावा, असा प्रस्ताव मंजुरीस्तव ग्रामविकास व जलसंधारण विभागास पाठविल्याची माहिती काजळे यांना जिल्हा परिषद व उपविभाग निफाड यांच्याकडून पत्राद्वारे कळविण्यात आली आहे. त्यामुळे या रस्त्याचे भाग्य लवकरच उजाळणार आहे.
कोट
कारसूळ – जुन्या पालखेड रस्त्याच्या कामासाठी उपोषणाचे हत्यार उगारताच या रस्त्यासाठी ८० लाखांचा प्रस्ताव सादर करण्यात आला आहे. त्याबद्दल मनापासून धन्यवाद.
– देवेंद्र काजळे, माजी उपसरपंच, कारसूळ
