पंतप्रधान नरेंद्र मोदींनी घेतली लस; केले हे आवाहन

नवी दिल्ली – पंतप्रधान नरेंद्र मोदी यांनी दिल्लीतील एम्समध्ये कोरोना व्हायरसची पहिली लस घेतली. मोदी यांनी स्वतः सोशल मिडिया प्लॅटफॉर्मवर याची माहिती जनतेला दिली. त्यांनी ट्वीटमध्ये म्हटले आहे की, ‘मी एम्समध्ये कोविड-१९ व्हॅक्सीनचा पहिला डोज घेतला. आपले डॉक्टर आणि वैज्ञानिकांनी कोरोना महामारीविरुद्ध दिलेला लढा उल्लेखनीय आहे. मी सर्वांना आवाहन करतो की ज्यांना आवश्यकता आहे त्यांनी नक्की व्हॅक्सीन घ्यावे.’

पंतप्रधान मोदींनी भारत बायोटेक कंपनीचे कोव्हॅक्सीन लावले आहे. कोव्हॅक्सीन नावाचे व्हॅक्सीन भारत बायोटेकने भारतीय आयुर्विज्ञान संशोधन परिषद आणि राष्ट्रीय विषाणू विज्ञान संस्था यांनी मिळून तयार केले आहे. पुद्दुचेरीची सिस्टर पी. निविदा यांनी पंतप्रधान मोदींना व्हॅक्सीनचा डोज दिला. 

एम्सचे संचालक डॉ. रणदीप गुलेरिया देखील यावेळी उपस्थित होते. विरोधकांनी भारतात तयार होणाऱ्या व्हॅस्कीनवर प्रश्नचिन्ह उपस्थित केले होते. त्यामुळे मोदींनी ही लस घेऊन विरोधकांना उत्तर दिले आहे. कारण काहींनी तर चक्क मोदींनी पहिले लस घ्यावी मगच आम्ही घेऊ, अशीही भूमिका घेतली होती.

https://twitter.com/narendramodi/status/1366200664402006016

भारतात कोरोनावर मात करण्यासाठी मोठ्या प्रमाणास लसीकरणाला प्रारंभ झाला आहे. सुरुवातीला वैद्यकीय क्षेत्रातील कर्मचारी आणि पोलिसांना व्हॅक्सीन दिल्यानंतर आजपासून ६० वर्षांवरील नागरिकांसाठी लसीकरण सुरू झाले आहे. यात गंभीर आजार असलेल्या ४५ ते ६० वर्ष वयोगटातील नागरिकांनाही सामील करून घेण्यात आले आहे. 

यातील कोणतीही व्यक्ती कोणत्याही केंद्रावर लस घेऊ शकते, असे केंद्रीय आरोग्य मंत्रालयाने म्हटले आहे. सरकारी रुग्णालयात मोफत लस देण्यात येईल. तर खासगी रुग्णालयात २५० रुपये घेण्यात येणार आहे. यात १५० रुपये व्हॅक्सीनचे आणि १०० रुपये सेवा शुल्क असेल.