नवी दिल्ली – सध्या संसद भवनानजिकच नव्याने बांधण्यात येणाऱ्या संसद भवनाखाली सुरक्षेच्या दृष्टीकोनातून तीन मोठी भुयारे तयार करण्यात येणार असून पंतप्रधान व उपराष्ट्रपतींच्या नवीन निवासस्थानांना तसेच खासदारांच्या कक्षांना ही भुयारे जोडली जातील. तिथून या अतिमहत्त्वाच्या व्यक्तींची ये-जा सुरू झाल्याने सुरक्षा व्यवस्थेवरील ताणही कमी होणार आहे.
या भुयारातून अतिमहत्त्वाच्या व्यक्तींना नव्या संसद इमारतीत आणण्यासाठी व तिथून परत नेण्यासाठी कारचा वापर करता येईल. नवे संसद भवन बांधण्याच्या सेंट्रल व्हिस्टा प्रकल्पात साऊथ ब्लॉकच्या दिशेला पंतप्रधानांचे नवे निवासस्थान व त्यांचे नवे कार्यालय बांधले जाणार असून उपराष्ट्रपतींचे नवे निवासस्थान नॉर्थ ब्लॉकच्या दिशेला असेल. परंतु राष्ट्रपतींनी संसदेत येण्याचे प्रसंग खूप कमी येतात. त्यामुळे राष्ट्रपती भवन ते नवीन संसद भवन या दरम्यान भुयार बांधण्याचा अद्याप तरी विचार करण्यात आलेला नाही.
