प्राथमिक शिक्षक प्रदिप देवरे मिळवून देताहेत विद्यार्थ्यांना आंतरराष्ट्रीय व्यासपीठ…
…
संदीप मोरे
…
निफाड – निफाड तालुक्यातील बोकडदरे येथील उपशिक्षक प्रदिप देवरे हे युको ट्रेनिंग सेंटर या स्विडनच्या संस्थेचे भारतातील समन्वयक आहेत. ते या संस्थेच्या माध्यमातून भारतातील विविध शाळेतील विद्यार्थ्यांना संस्थेने आयोजित केलेल्या विविध स्पर्धा व उपक्रमांसाठी व्यासपिठ उपलब्ध करून देत आहेत.
युको ट्रेनिंग सेंटर स्विडन ही संस्था पर्यावरण शिक्षण, सुयोग्य व्यापार व देशादेशांतील सुसंवाद या विषयांत कार्य करते. जान ताहिर बाबर हे याचे चेअरमन असून इज्जत हसन हे जनरल सेक्रेटरी आहेत. यात प्रत्येक देशातून एका समन्वयकाची निवड करण्यात आली आहे. प्रदिप देवरे हे भारताचे समन्वयक म्हणून काम पाहतात.
ही संस्था विविध आंतरराष्ट्रीय दिन साजरा करण्यासाठी स्पर्धा व उपक्रमांचे आयोजन करत असते. २१ सप्टेंबर आंतरराष्ट्रीय शांतता दिनाचे औचित्य साधून जागतिक शांतता अबाधित रहावी व विद्यार्थ्यांमधे हे मूल्य रूजावे, त्यांनी भविष्यातील सर्वसमावेशक जगाचे प्रतिनिधित्व करावे यासाठी जागतिक शांतता या विषयावर आॕनलाईन चित्रकला स्पर्धा , निबंध स्पर्धा , कविता लेखन स्पर्धा व चित्रफीत संदेश स्पर्धा जगभरातील विद्यार्थ्यांसाठी आयोजित केल्या होत्या.
प्रदिप देवरे यांच्या मार्गदर्शनाखाली त्यांच्या शाळेतील स्नेहल सानप, माहेश्वरी सानप, कृष्णा सानप, प्रथमेश काळे, मयूर मोरे , सलोनी पवार, निलिमा माळी, स्नेहल जाधव, शुभम जाधव सुहानी गुजर या विद्यार्थ्यांनी तसेच महाराष्ट्रभरातील व भारतातील अनेक शाळेतील १०० पेक्षा अधिक विद्यार्थ्यांनी सहभाग नोंदवला. त्यासाठी सर्वांना इटीसी कडून आकर्षक प्रमाणपत्र त्यांच्या अधिकृत पेजवर वितरीत करण्यात आले. जिल्हा परिषद शाळेतील विद्यार्थ्यांच्या कलाकृती सातासमुद्रापार आंतरराष्ट्रीय व्यासपीठ मिळवून देण्याचे काम प्राथमिक शिक्षक प्रदिप देवरे करीत आहेत.
प्रदिप देवरे मायक्रोसाॕफ्टचे इनोव्हेटीव्ह एज्युकेटर एक्स्पर्ट आहेत. ते स्काईप इन द क्लासरूमच्या माध्यमातून त्यांच्या विद्यार्थ्यांना जगातील विविध भागांची व्हर्च्युअल फील्ड ट्रीप घडवत असतात.
आंतरराष्ट्रीय स्पर्धेतील सहभागाबद्दल मिळालेले प्रमाणपत्र