बँक कर्मचा-यांना मारहाण
नाशिक – कर्ज वसूलीसाठी गेलेल्या बँक कर्मचा-यांना कार खरेदी विक्रीचा व्यवसाय करणा-या कर्जदाराने शिवागाळ करीत बेदम मारहाण केल्याची घटना महात्मानगर येथे घडली. या प्रकरणी गंगापूर पोलीस ठाण्यात सरकारी कामात अडथळा व विविध कलमान्वये गुन्हा दाखल करण्यात आला आहे.
बॉबी श्रीचंद मुरजानी (रा.दत्तप्रभू बंगला,होंडा शो रूम जवळ,महात्मानगर) असे वसूली अधिका-यांना मारहाण करणा-या संशयीत कर्जदाराचे नाव आहे. पोलीसांनी दिलेल्या माहितीनुसार याप्रकरणी युनियन बँकेच्या सातपूर शाखेचे प्रबंधक अजयसिंग सेगर यांनी तक्रार दाखल केली आहे. मुरजानी यांनी मालमत्ता तारण ठेवून युनियन बँकेच्या सातपूर शाखेतून कर्ज घेतले आहे. कर्जाची परतफेड न झाल्याने प्रबंधक सेगर आणि अमित व्यास हे वसूली अधिकारी गुरूवारी (दि.२५) दुपारी मुरजानी यांच्या घरी गेले असता ही घटना घडली. संशयीताने बँक अधिकाºयांना बंगल्यात बोलावून घेत तुमची हिम्मत कशी झाली माझ्या घरी येण्याची असे म्हणत शिवीगाळ केली. तसेच दोघा अधिका-यांना लाथाबुक्यांनी मारहाण करून बंगल्या बाहेर पडण्यास मज्जाव केला. अधिक तपास सहाय्यक निरीक्षक बैसाणे करीत आहेत.
……
भूमाफीयांकडून घरात घुसून मारहाण
नाशिक – आनंदवली येथील मंडलीक खून प्रकरण ताजे असतांनाच भूमाफीयांनी घरात घुसून एकास मारहाण करण्यात आल्याची घटना पोकार कॉलनी परिसरातील साईनगर भागात घडली. याघटनेत दोघा संशयीतांनी जमिनीचा वाद मिटवा अन्यथा कुटूंबियास जीवे ठार मारू अशी धमकी दिली आहे. याप्रकरणी म्हसरूळ पोलीस ठाण्यात गुन्हा दाखल करण्यात आला आहे.
सागर मारूती भाबड (रा.दातली खोपडी ता.सिन्नर हल्ली पॅरामाऊन्ट बी विंग,मुंबईनाका) व योगेश कुटे (नाव गाव पूर्ण नाही) अशी मारहाण करणा-या संशयीतांची नावे आहेत. याप्रकरणी लक्ष्मण सुधाकर गायकवाड (रा.साईनगर,पोकार कॉलनी) यांनी तक्रार दाखल केली आहे. पोलीसांनी दिलेल्या माहिती नुसार गायकवाड यांची जोरण ता.दिंडोरी येथे आईची वडिलोपार्जीत शेत जमिन आहे. त्यातील आठ एकर जमिनीचा पंधरा वर्षापूर्वी साठे खताद्वारे व्यवहार झाल्याचे भासवून सचिन धात्रक याने ताबा घेतला आहे. यापोटी दीड कोटी रूपये अदा करण्यात आल्याचा त्याचा दावा आहे. ही जमिन खरेदी करून द्यावी यासाठी भुमाफीयांकडून गायकवाड कुटूंबियास त्रास दिला जात असल्याचा आरोप होत आहे. तक्रारदार गायकवाड व त्यांचे वडिल शुक्रवारी (दि.२६) सायंकाळच्या सुमारास आपल्या घरात असतांना ही घटना घडली. दोघा संशयीतांनी अनधिकृतपणे घरात प्रवेश करून शिवीगाळ करीत लक्ष्मण गायकवाड यास लोखंडी फायटरने मारहाण केली. यावेळी तुझ्या आईला सचिन धात्रकच्या कागदपत्रांवर साक्षरी करण्यास सांग अन्यथा कुटूंबियांस संपवून टाकू अशी धमकी दिल्याचे तक्रारीत म्हटले आहे. अधिक तपास हवालदार देवरे करीत आहेत.
…..
टोळक्याकडून एकास मारहाण
नाशिक – जुन्या वादाची कुरापत काढून एकास टोळक्याने बेदम मारहाण केल्याची घटना कमोदनगर येथे घडली. या घटनेत त्रिकुटाने बांबू आणि दगडाचा वापर केल्याने तरूण जखमी झाला असून, याप्रकरणी इंदिरानगर पोलीस ठाण्यात गुन्हा दाखल करण्यात आला आहे. अभि वैद्य,सागर वैद्य व गौरव गौर अशी मारहाण करणाºया संशयीतांची नावे आहेत. अनिकेत श्रीकृष्ण समुद्रवार (२५ रा.गणपती मंदिराजवळ,कमोदनगर) यांनी तक्रार दाखल केली आहे. समुद्रवार गुरूवारी (दि.२५) रात्री इच्छापूर्ती गार्डन परिसरात उभा असतांना त्यास त्रिकुटाने गाठले. यावेळी जुन्या भांडणाची कुरापत काढून संशयीतांनी शिवीगाळ करीत बेदम मारहाण केली. या घटनेत लाकडी बांबू आणि दगड फेकून मारल्याने अनिकेत समुद्रवार जखमी झाला असून त्यास सशयीतांनी तुझा बेत पाहतो अशी धमकी दिली आहे. अधिक तपास पोलीस नाईक बरेलीकर करीत आहेत.
