वाजंत्री वाहनातून मोबाईल चोरी
नाशिक : विवाहसोहळयात वाजंत्री वाजवत असतांना चोरट्यानी कामगारांचे वाहनात ठेवलेले मोबाईल चोरून नेल्याची घटना गंगाघाटावर घडली. याप्रकरणी पंचवटी पोलीस ठाण्यात चोरीचा गुन्हा दाखल करण्यात आला आहे. इमरान आरिफ शहा (रा.मालेगाव रोड,सटाणा) यांनी याप्रकरणी तक्रार दाखल केली आहे. शहा यांचा बॅन्जो व्यावसायीक असून ते गेल्या गुरूवारी (दि.७) विवाह सोहळय़ा निमित्त आपला ताफा घेवून पंचवटीत आले होते. विवाहपूर्वी नवरदेवाच्या मिरवणूकीत ही घटना घडली. मिरवणुकीत बॅन्जो वादक वाजंत्री वाजवत असतांना अज्ञात चोरट्यांनी बॅन्जोच्या एमएच ४१ एयू १९२७ या वाहनात ठेवलेले कामगारांचे सुमारे ३० हजार रूपये किमतीचे तीन मोबाईल चोरून नेले. अधिक तपास पोलीस नाईक वाघमारे करीत आहेत.
……..
दुकानातून मोबाईल चोरी
नाशिक : कामगाराचे लक्ष नसल्याची संधी साधत भामट्या ग्राहकाने दुकानातील मोबाईल चोरून नेल्याची घटना दुधबाजारात घडली. याप्रकरणी भद्रकाली पोलीस ठाण्यात गुह्याची नोंद करण्यात आली असून पोलीस परिसरातील सीसीटिव्हीच्या आधारे चोरट्यांचा शोध घेत आहेत.
अविनाश शिवाजी आहिरे (रा.हेलबावडी,त्र्यंबकदरवाजा) यांनी याप्रकरणी तक्रार दाखल केली आहे. आहिरे यांचे दुधबाजारातील म्युझिक दरबार समोर मोबाईल दुरूस्ती आणि विक्रीचे दुकान आहे. गेल्या शनिवारी (दि.१६) खरेदीच्या बहाण्याने दुकानात आलेल्या अज्ञात चोरट्याने कामगाराचे लक्ष नसल्याची संधी साधत विक्रीसाठी काऊंटरवर ठेवलेला २० हजार रूपये किमतीचा मोबाईल चोरून नेला. अधिक तपास हवालदार जाधव करीत आहेत.
……..
खिडकीतून मोबाईल चोरी
नाशिक : बेडरूमच्या खिडकीत हात घालून चोरट्यांनी चार्जिंगला लावलेला मोबाईल चोरून नेल्याची घटना पखालरोड भागात घडली. याप्रकरणी मुंबईनाका पोलीस ठाण्यात चोरीचा गुन्हा दाखल करण्यात आला आहे. सारंग शिवाजीराव मराठे (रा.जिनीत अपा.विठ्ठल मंदिरासमोर पखालरोड) यांनी याप्रकरणी तक्रार दाखल केली आहे. मराठे कुटूंबिय मंगळवारी (दि.१९) आपल्या कामात व्यस्त असतांना ही घटना घडली. दुपारच्या सुमारास अज्ञात चोरट्याने खिडकीत हात घालून बेडरूममध्ये चार्जिंगसाठी लावलेला त्यांचा महागडा मोबाईल चोरून नेला. अधिक तपास माळोदे करीत आहेत.
