नाशिक – व्यावसायीकांकडे खंडणी मागितली, गुन्हा दाखल

व्यावसायीकांकडे खंडणी मागितली, गुन्हा दाखल

नाशिक : कोयत्याचा धाक दाखवून सराईत गुन्हेगाराने व्यावसायीकांकडे खंडणी मागितल्याची घटना नुकतीच घडली. डिमांड वाढल्याने एका व्यावसायीकाने खंडणी देण्यास नकार दिल्याने संशयीताने व्यापा-यांना जीवे ठार मारण्याची धमकी देत दोन दुकानांसह मालवाहू वाहनाचे नुकसान केले.याप्रकरणी मुंबईनाका पोलीस ठाण्यात गुन्हा दाखल करण्यात आला आहे.
विशाल भगवान आढाव (रा.वासननगर) असे संशयीताचे नाव असून तो पोलीस रेकॉर्डवरील सराईत गुन्हेगार आहे. याप्रकरणी धनंजय प्रभाकर शिंगणे (रा.इंदिरानगर) यांनी तक्रार दाखल केली आहे. शिंगणे यांचे कालिकानगर भागातील हरि निवास सोसायटीत साहिल सोलर शॉपी नावाचे दुकान आहे. या भागात संशयीताची दहशत असून तो परिसरातील व्यावसायीकांकडून नियमीत खंडणी वसूली करतो. थेट जीवे मारण्याची धमकी देत असल्याने शिंगणे यांनीही प्रारंभी वेळोवेळी त्यास खंडणी दिली. दोन दिवसांपूर्वी दोन हजार रूपये घेवून गेलेला असतांना गेल्या सोमवारी (दि.८) संशयीताने पुन्हा शिंगणे यांना दुकानात गाठले. यावेळी त्याने जास्तीच्या रकमेची मागणी केली असता शिंगणे यांनी नकार दिला. त्यामुळे संतप्त झालेल्या संशयीताने कोयत्याचा धाक दाखवून जीवे ठार मारण्याची धमकी देत शिंगणे आणि शेजारच्या दुकानात शिरून धुडघूस घालत दुकानांची तोडफोड केली. दुस-या दिवशी शिंगणे यांची मालवाहू टेम्पो दुकानासमोर उभा असतांना संशयीताने त्याचीही तोडफोड केली. अधिक तपास सहाय्यक निरीक्षक किरण रौंदळे करीत आहेत.

……

शुभेच्छांचे विनापरवानगी फलक लावणे पडले महागात

नाशिक : शहरात वाढदिवस आणि शुभेच्छांचे विनापरवानगी फलक लावणे नागरीकांना चांगलेच महागात पडत असून, महापालिकेच्या वतीने थेट पोलीसात तक्रारी दाखल केल्या जात आहे. भद्रकाली पोलीस ठाणे हद्दीत वेगवेगळया भागात विनापरवानगी लावण्यात आलेल्या दोन फलकांबाबत पोलीस दप्तरी नोंद करण्यात आली आहे.
प्रशांत यादवराव शिर्के (रा.पिंगळेनगर,मेहरधाम) यांनी याप्रकरणी तक्रार दाखल केली आहे. शहरातील शुभेच्छा फलकांना मनपाने लक्ष केले असून तपासणी अंती खडकाळी सिग्नल आणि त्र्यंबकनाका भागात लावलेल्या फलकावरील संबधीतांवर कारवाईचा बडगा उगारण्यात आला आहे. खडकाळी भागातील शिवसेना कार्यालया समोर मनपाच्या दिशादर्शक फलकाच्या कमानीवर विनापरवानगी आकाश पगारे यांच्या वाढदिवसानिमित्त एपी ग्रुपच्या फलक लावण्यात आला आहे. त्यावर अर्जुन पगारे,आकाश पगारे,दामोदर पगारे व एका कोप-यात ओमकार जाधव आणि सागर भालेराव आदींचे छायाचित्र आहे. तर त्र्यंबकनाका येथील हॉली क्रॉस चर्चच्या भिंतीवर हार्दीक अभिनंदनाचा बॅनर लावण्यात आला आहे.त्यावर दिपक डोके आणि उत्तम जाधव यांचा फोटो आहे. अधिक तपास अनुक्रमे हवालदार पठाण आणि पोलीस नाईक जाधव करीत आहेत.
……..