नाशिक – कोरोना रुग्णाला जास्त रक्कम आकारून ती रक्कम अदा न केल्याने रुग्णालयातून तीन दिवस डिस्चार्ज न केल्याचा प्रकार समोर आला आहे. हा प्रकार मुंबई-आग्रा हायवेवरील वोक्हार्ट हॉस्पिटलमध्ये घडला आहे. याप्रकरणी कारवाई करण्याच्या सूचना महापालिकेच्या आरोग्य वैद्यकीय विभागास देण्यात आल्या आहेत. तशी माहिती अतिरिक्त आयुक्त तथा सीबीआरएस सिस्टिमचे प्रमुख सुरेश खाडे यांनी दिली आहे.
खाडे यांनी दिलेल्या माहितीनुसार, शहरातील वोक्हार्ट हॉस्पिटल मध्ये ६८ वर्षीय व्यक्ती कोरोनाने बाधित असल्याने उपचारासाठी दाखल झाली होती. गेल्या तीन दिवसांपासून या रुग्णावरील उपचार बंद करण्यात आले होते. रुग्णाला दिलेल्या बिलात जादा रक्कम आकारली होती त्यामुळे ती रक्कम रुग्णाने न दिल्यामुळे तो रुग्ण बरा झाल्यानंतर ही त्याला घरी सोडत नव्हते.
या सर्व बाबत माझ्याकडे तक्रार प्राप्त झाल्यानंतर व्होकार्ड हॉस्पिटलच्या कोरोना अतिदक्षता विभागात पी.पी.ई.किट घालून माझ्यासोबत मुख्य लेखा परीक्षक बी.जे सोनकांबळे व डॉ.पावसकर यांच्या पथकाने पाहणी केली.
त्या रुग्णाची समक्ष भेट घेऊन त्याच्याशी चर्चा करून त्याची तक्रार समजावून घेतली. त्यावेळी व्होकार्ड हॉस्पिटलचे डॉ. निलेश गुमारदार व डॉ. नीलिमा जोशी हे उपस्थित होते. तक्रारदार रुग्णाने वोक्हार्ट प्रशासनाबाबत केलेल्या गंभीर तक्रारीची दखल घेण्यात आली. वाढीव आकारलेली रक्कम कमी करण्याच्या सूचना वोक्हार्ट प्रशासनास देण्यात आल्या.
तसेच त्वरित त्या रुग्णास घरी सोडण्याचे आदेश यावेळी देण्यात आले. तसेच या गंभीर तक्रारीबाबत आरोग्य वैद्यकीय विभागास हॉस्पिटलवर आपत्ती व्यवस्थापन कायदा २००५ व साथरोग प्रतिबंधात्मक कायदा १८९७ आणि शासनाच्या प्रचलित नियमानुसार कायदेशीर कारवाई करण्याबाबत सूचना देण्यात आल्या असल्याची माहिती अतिरिक्त आयुक्त तथा सीबीआरएस सिस्टिमचे प्रमुख सुरेश खाडे यांनी दिली.
Follow India Darpan
ताज्या बातम्या आणि चर्चांसाठी आमच्या सोशल मीडियावर जोडा!
ग्रामीण ते शहरी आणि जुन्या ते नव्या अशा सर्वच पातळीवर आम्ही विकास पत्रकारितेला अधिक महत्त्व देतो. समाजोन्नती व्हावी, लोकशाही बळकट व्हावी, अन्यायाला वाचा फोडावी आणि विधायक कार्य घडावे यासाठी आम्ही आग्रही आहोत.
